Sunday, April 11, 2010

2


رغم إن لا المود و لا الصحة و لا الظروف مناسبة

لقيت إن من حقه عليا يتعمل له بوست

و يتفِرِح له كمان :)

اشمعنى أخوه؟ :)

أنــا بقيت "خــالــة"

كــلاكيت تاني مرة




Sunday, March 28, 2010

شكـــراً


شكراً يارب على حاجات كتير،،


على كل حاجة طلبتها منك ومنعتها عني عشان ماليش خير فيها

على أي حاجة ماطلبتهاش منك وإديتهالي عشان ليا خير فيها

على كل إشارة بعتهالي عشان تهوّن عليا بيها

و عشان تفهّمني
حاجة ماكنتش فاهماها..بيها

على كل رسالة توضيح طلبتها منك _أو ماطلبتهاش_ وبعتهالي

عشان أحسّ إني مش بعيدة أوي..و إنك بتقرّبني منك

على كل طبطبة منك جت في وقتها

على كل مرة جبرْت فيها كسري

على كل لحظة حسستني فيها
بالامتنان ليك
.
.
.
شكــراً يارب على كل حاجة شكرتك

أو نسيت _سهو أو تقصير مني_ أشكرك عليها

..........................................................

اللهم إني أُشهِدك وأُشهِد حمَلة عرشِك وملائكتك
وجميع خلقِك إنك أنت الله لا إله إلا أنت
و أن محمداً عبدك و رسولك




Friday, March 26, 2010

أنا عايـزة من ده


بحب أوي ملامح الناس الكبيرة..العجوزة

الوش المكرمش..والعيون اللي لوّنها الزمن..

و الإيدين اللي نقشها النمش بلون الشمس..

الإيد الحنينة اللي اتعودت تطبطب على الصغير و الكبير..محتاج أو مش محتاج..

الابتسامة الصافية اللي تحسّسك إن الدنيا لسه بخير..

و إن فيه أمل إنك توصل للسن ده وقلبك لسه فيه مكان للفرح..

و لسه عندك القدرة على الابتسام..

رغم الشروخ اللي ملت قلبك بفعل الزمن والناس..

و عمايلهم اللي تهد جبال..
.
.
بحسّ في ملامحهم بطيبة وحنية مالهاش حدود..

كان نفسي أوي يبقى عندي تيتة أو جدو.. :(

عشان وقت ما الدنيا تضيق بيا ألاقي حد أهرب من الحزن

و أروح له..أترمي في حضنه..

يطبطب عليا..يبقى فاهمني من غير ما أحكي..

أنا مش عايزة أحكي..أو مش عارفة..مش عارفة

محتاجة حضن حنيّن أترمي فيه..وإيد أحنّ تطبطب عليا..

أجيب منين أنا دلوقتي تيتة أو جدو؟؟

:(




Sunday, March 21, 2010

أنـا خايفــة


كل ما أخاف من عفريت يطلع لي
.
.
.
.
بقالي كام شهر بتحصل لي حاجة غريبة جدا

هي حصلت لي كذا مرة قبل كده..

و دي كانت أبرزها

لكن زمان كانت بصورة أبسط من كده

و لمدة أقل بكتيييييير من دلوقتي

ايه بأه اللي بيحصل لي دلوقتي؟

مفيش حاجة أفكّر فيها _بشكل سلبي_ أو أخاف منها

أو أقلق منها أو حتى أحسّ بيها..إلا و تحصل

الموضوع بقى بزيادة أوي..لحد ما وصل للأحلام

يعني ياربي مفيش كفاية عليا كوابيسي؟ :(

المشكلة إن كلها مشاعر سلبية

يعني مابيحصلش إني أحس بحاجة حلوة وتحصل

أو حاجة بتمناها أو بحلم بيها أو نفسي فيها..وتحصل

بالعكس،، ما بيحصلش غير اللي خايفة إنه يحصل

أنا وصلت لمرحلة إني خايفة أفكّر..خايفة أحسّ

مش عارفة بجد أعمل ايه

و تعبت..بجد تعبت

و خايفة

:(