Saturday, October 30, 2010


ـ"مَن جرّبَ الكيَّ لا ينسى مواجعه..

ومَن يرى السُمَّ لا يشقى كمن شَـرِبَ
"

.
.
.

مهما قولت إنك حاسس باللي أدامك

و مهما حسيت بيه فعلا..

و حاولت تأكّد له ده..أو حتي تأكّده لنفسك

درجة إحساسك بيه مش هاتوصل لـ 10/1 من إحساسه..

تحس إزاي بحاجة ماجربتهاش؟

تقدّر ازاي إحساس ماعدّاش عليك؟

حياة كاملة ماعيشتهاش قبل كده؟

عارف طعم العلْقم؟

طيب دوقته قبل كده؟!

مهما حاولت مرّات ومرّات..

مش هاتعرف تحكم على حاجة مادوقتهاش!

عشان كده..ليكم كلكم ياللي بترددوا نفس الاسطوانة دي:

(حاسين بيكي - مقدّرين إحساسك - متخيلين حياتك - إلخ...)

بقولكم كـلــكم :

"انتم مش عارفين حاجة ولا حاسين بأي حاجة..

من امتى كان اللي إيده في الميه..زي اللي إيده في النار؟

و ياريت توفّروا لنفسكم الكلمتين دول..ومعاهم النظرتين إياهم!

و اعرفوا كمان حاجة مهمة/أخيرة:

الحاجات دي بتوجع..أكتر ما بتريح!"

ـ




Monday, October 25, 2010

تيجي؟


تيجي نهرب..
م الحقيقة..
م الصور..
من خبر عاجل يخض..
تيجي..
لا نفهم..
ولا نعرف..
ولا نقدر نرد..!
تيجي..
نتعلم سخافة..
بشويش كده..
بصنعة لطافة..
وتبقى بياع الكنافة..
وأبقى بياع الكلام..؟
تيجي نهرب..
م الألم..!
م الحزن..!
م الأحلام..!
تيجي نتعلم ننام..
تيجي نتباع بكام..
تيجي..
نعمل عملية تجميل..
و نشيل.........
ولا حرام..
تيجي..
نبقى طوب..خشب..إزاز..!
بلاطة جنب بلاطة..
تيجي..
ننسى بعض ببساطة؟؟؟؟
وتبقى بياع البطاطا..
وأبقى بياع الهوا..
تيجي.........
سوا ...... سوا
نهرب..
م الأمل..
نطلع بطاقة..
بدون عمل..
نأجر عجل..
نركب جمل..
تيجي..
نبقى ف اللذاذة؟
وأجيب مصاصة..
تجيب بزازة..
تيجي نبقي..
ملناش عازة؟!
زي كل شئ جميل..
تيجي......؟
مستحيل..!
هي كده..
وملهاش بديل..
تيجي رجلك..
تيجي..
تهرب بجلدك..تنجرح..
يوجعك قلبك بجد..!
لا تقبل أي حاجة..
ولا تبقى أي حد..
تيجي..............؟
.
.
.

علي سلامة


Friday, October 22, 2010

اكتشاف


كنت فاكراني برفــرف

أتارينـي بفـرفـــر

وأنا مش حاسة..!


ـ


Monday, October 18, 2010

بيني و..بيني


حوار..مجرد حوار

-أنا : مالك؟ فيه ايه؟

-أنا بردو : مفيش..مالي؟

- ايه اللي مضايقك؟

- مش متضايقة..أنا كويسة!

- انتي زعلانة ليه؟

- مش زعلانة..خالص

- كداااااابة و ستين كدابة!

- آه أنا كدابة..و بكدب عليكي..سيبيني في حالي

- طيب بتكدبي ليه؟ مخبية ايه؟

- الإجابة هاتفرق في ايه؟ طالما عارفة إني هاكدب

- مش هاسيبك غير أما تقولي

- أقول ايه؟ مفيش حاجة أقولها

- طب أقولك أنا! انتي زعلانة عشان......؟

- (صمت)

- وللا عشان .........؟

- (صمت)

- وللا عشان .......؟

- كفاية

- وللا عشان ........؟

- حرام عليكي..بجد كفاية

- حرام عليكي انتي اللي بتعمليه..
هاتفضلي كاتمة كاتمة كاتمة لحد امتى؟
هاتموتي..والله هاتموتي..

- عارفة..وده المطلوب..خلاص ارتحتي؟

- أنا زعلانة عشانك..و عليكي :(

- وأنا مش عايزة حد يزعل عشاني..ولا عليا..
ومش محتاجة طبطبة من حد..ولا حتى منك!

- :(

ـ



Thursday, October 14, 2010

بلاد العجائب


كـــل حاجة في بلدنا بتغلا

إلا حاجة واحدة..

كل يوم بترخص زيادة عن اليوم اللي قبله

البني آدم!

ـ




Monday, October 11, 2010



يــوم فــوق..فوق السحاب في السما

و 100 تـحـــــت..تحت التراب في الأرض!

ـ



Monday, October 4, 2010

و من السمــوم..ترياق


ـ"آخر الذنــوب توبة..ومن السمــوم..ترياق"

.
.
.

ماعرفش ازاي ولا ليه ولا تحديداً امتى..

بس ده بالظبط اللي حصل!

يوم ما بطّلت ألحّّ في الدعوة دي

هو نفس اليوم اللي حسيت إني بدأت أخفّ فيه..

هو نفس اليوم اللي بدأ السم يتسحب من روحي فيه..

هو نفس اليوم اللي بدأت أفهم الحكمة من معظم اللي مريت بيه..!

شكراً يارب.. شكراً على كل حاجة

:)




Saturday, October 2, 2010

سبحانه


هو بــس اللي باقـي

ملكـوتـه لا نهـائي