Thursday, June 30, 2011

!!؟؟!!


سؤال يطرح نفسه "أرضـًا!":

هو أنا امتى هاخاف من حاجة..

و ماتحصلش؟

امتى؟

.
.
.

أنـا _حقيقي_ تعبت مني


Tuesday, June 28, 2011

كيفــك انت؟


ازي حالك؟

مش لسه بردو زي حالي؟

ازي حالك؟

لسه بتضمّك شوارع؟

لسه طارداك البيوت؟

لسه قادر ع السكوت؟

ازي حالك؟

مش لسه حيّ؟

الله يعينك ع اللي جَيّ..!

.
.
.

* العنوان: أغنية لفيروز

كلمات البوست: مجهولة المصـدر





Sunday, June 26, 2011

وحــدُه المـوت يتّسـع


أنا بقيت على شعرة

لو اتقطعت مني

مش عارفة ممكن أعمل ايه؟

أنا مابقتش مِلكي..!

.
.
.

للمرة التانية

في نفس الشهر

أكرر نفس الدعاء:

"يارب..احميني من نَفسي"

.
.
.

يارب

على أد كُرهي للدنيا دي..

و كُفري بيها..

قوّي إيماني بيك..

انت بس اللي باقي..

انت و......بس..!

.
.
.

* العنوان لـ سوزان عليوان




Saturday, June 25, 2011

نسيت أنسـاك


من فترة كده

أخدت عهد على نفسي

إنك كل ما تيجي على بالي

هـ "أستغفر"

لعلّي أنسى..أو أتلهي..أو أسرح في أي حاجة

و لما جه وقت تنفيذ العهد

لقيتني مش هاعرف أعمل أي حاجة

غير الاستغفار..!

لا هاعرف أتكلم..ولا أفكر..ولا أشتغل..

ولا أي حاجة

.
.
.

هو أنا هاخفّ منك امتى بأه؟





Thursday, June 23, 2011

Wednesday, June 22, 2011


متهيألي لو كانت "مخدتي"

زرعة بنفسج مثلا أو ياسمين

ماكنتش هابقى حريصة الحرص ده كله

على إني أرويها باستمرار





Tuesday, June 21, 2011

ممكن؟


عقلي العزيز..

قلبي الحبيب..

إحساسي الـ........عجيب..!

بعد السلامات والاحترامات

و خالص التحيات

أما بعد ،،،

عِشنا مع بعض سنين وسنين

و حاجات حلوة و....وحشة كتير

تعبتوني..و تعبتكم..و تعبنا بعض

أوي..جدا..خالص..بزيادة

أنا بقول نكتفي بهذا القدْر من العِشرة

و زي ما دخلنا بالمعروف..

نفارق بعض دلوقتي بالتي هي أحسن..

عشان بسببكم أنا دلوقتي بنهار..

و بما إن أوبشن

"أكتفي بهذا القدْر من التنفُّس"

غير متاح للأبد

فـ أعتقد المفروض أدوّر على حاجة تانية قابلة للتحقيق

.
.
.

ها؟

صعبت عليكم وللا لسه؟

طب هاتسيبوني أعيش من غيركم؟

الله..!

الحياة هاتبقى حلوة أوي

من غير عقل ولا قلب ولا إحساس

هاتبقى هايلة حقيقي..!

.
.
.

لكم مني خالص التقدير

و وافر الاحترام

سلامات

طيبون..!

ـ





Wednesday, June 15, 2011

ارحـَم..تـُرحـَم


الرحمة مفيدة

الرحمة مريحة

الرحمة حلوة

الرحمة جميلة

الرحمة رائعة

الرحمة عظيمة

.
.

آه و ربنـــا..!

.
.
.


البوست ده إهـداء خاص

لـ : مُحبّي الـعدس





Tuesday, June 14, 2011

يا الله


يارب

أنا مش هاممني أفهم حِكمتك

أد ما هاممني تغطّيني برحمتك

.
.

يارب

بحق كَسْرة نِفسي دي

أنا اسـتويت





Monday, June 13, 2011

اللي مايعرفش يقول....؟


يا كل اللي حواليا

يا كل اللي بيضغطوا عليا

تعرفوا تقولوا "عدْس




Sunday, June 12, 2011

وجــع البنــات 4


أتاريه زي التطعيم الإجباري

داير على كل القلوب

حتى اللي _كانوا_ فاكرين نفسهم

"متحصّنين"..!

ـ


Friday, June 10, 2011

وجـَع الحـياة


ـ"فإن أسباب الوفاة كثيرة..

من بينها وجَـع الحياة"

.
.

محمود درويش

............................................

فرق كبيـر

بين إن الجـرْح يخفّ

و الوجَـع _تلقائيًا_ يتلاشى

و

إنك تاخد ع الوجَـع

و ماتبقاش حاسس بيه






Thursday, June 9, 2011


الريـحُ تعبث يارفاقي الطيبين..

وأنا أفتش عن يـد..

يـدٍ تُربِّت فوق أكتاف الحنين..

على جفون الليل تسدل سترةً من عسجد أو ياسمين

.
.

أنديرا غاندي





Tuesday, June 7, 2011

حقيقة 2


أثبتت التجربة

أن الانتكاسة

أصعب..وأسوأ..وأقسى

ألف مرة

من الإصابة بالمرض ذاته




Monday, June 6, 2011

كلنا خالد سعيد


دمك ماراحش _ولا هايروح_ هـدَر

.
.
.

هاتفضل في قلوبنا خالد

و في الجنة _بإذن الله_ سعيد




Sunday, June 5, 2011

تسمح؟


أيها النـوم العزيز..

العزيز جدًا..

تسمح لي بزيارة "كَريمة"؟





Saturday, June 4, 2011

ص ع ب


أدعيلك ازاي

ربنا يغفرلك

و أنا قلبي مش صافي لك

و مش عارف يسامحِك؟







Friday, June 3, 2011

لحظة


ـ"أعدى أعدائك..

نَفْسـك التي بين جنبيك"

.
.

لحظة

هي بتبقى لحظة

بتفقد فيها السيطرة على كل شئ

حتى نفسك

.
.

أوقات بخاف مني..عليا..!

.
.

يارب

احميني من نفسي




Thursday, June 2, 2011


ـ"فيه حاجات تتحس..وماتتقالش..!"

.
.

لا ينفع الحنية تتشحت

ولا ينفع الطبطبة تتطلب

أيوه..انتي مش حنيّنة

دي حقيقة محدش ينكرها

.
.

فيه مواقف بتعمليها..

بتتحفر جوايا

ببقى متأكدة إني _لو حصل (!)_ وعشت

لحد ما يبقى عندي 50 سنة مثلا

مش هانساها

مش عشان أنا قلبي أسود..أبدًا

بس عشان القسيّة ما بتتنسيش

.
.

انتي ازاي كده؟






Wednesday, June 1, 2011

حملة التدوين اليومي لشهر يونيو


بدايًة أنا مابحبش الالتزام

والتقيّد بوقت معين لعمل شئ معين

"بس هحاول يعني"

.
.

و بما إني بالفعل ورّطت نفسي في الحملة

" بس توريطة حلوة أكيد :) "

يعني خلاص لا مفر

و بما إني قرّبت جدا على دخول المفرمة

و الأيام الجاية بالنسبة لي

هاتبقى فحت و ردم و هلاك

و الوقت هايكون ضيق جدا

لظروف خارجة عن إرادتي

هاحتاج فيها ع الأقل

لـ 8 إيدين..و 4 رجلين..

وصحة 5 بني آدمين على صحتي..!

لكن هحاول _قدر الإمكان_ أوفي بوعدي لنفسي

و أكتب هنا يوميًا

أهو منها أفضّي شوية من اللي جوه :\

و منها أخفّ شوية عن موبايلي..

والنوتس اليومية اللي بتتكتب فيه..!

.
.

و بهذه المناسبة السعيدة

أحب أفرُك إيديا في بعضها وأقول:

استعنّا ع الشقا بالله