Sunday, May 30, 2010

Saturday, May 29, 2010

كلمة السر


ـ
"ونـَــس"

عايزة ونـَــس

محتـاجـة أتطمّن
.
.
.
مش طالبة كتير يعني




Friday, May 28, 2010

!!..اسمـع يا بابا


من كام يوم كنت قاعدة مع بابا بتفرج على التليفزيون _على غير العادة يعني_

وكان فيه برنامج مستضيف محمد صبحي


وبعيداً عن إنه أكتر ممثل كوميدي "كبير" بيضحكني ..

على المستوى الشخصي والإنساني بحترمه جدا جدا جدا


كان قاعد بيتكلم عن الجزء السادس من ونيس..

والأحداث فيه هاتمشي ازاي وكده


قال حاجة لفتت نظري جدا


بيقول للمذيع : تخيل أما ولادك ييجوا في يوم يقولولك انت ربّيتنا غلط!!

الكلمة صدمتني في الأول ..


لكن اللي قاله بعد كده غيّر الاحساس بالصدمة إلى اقتناع تام بالكلام :

أيوه ماعرفتش تربينا ..

انت ربيتنا على الصدق..و خرجنا لقينا كل الناس بتكذب وبتنافق وبتخدع


علمْتنا الأمانة..و بعدين لقينا الناس كلها حرامية وماعندهاش ضمير

غرست فينا الأخلاق و المبادئ..و حسينا بالغربة في المجتمع ..

مفيش فيه الحاجات دي.. مش موجودة!!


بقيت عايزة أقول له يا بابا.. الكلام ده ليك.. اسمع.. ركّز

يا بابا.. أنا عندي مشكلة _مش صغيرة ولا هينة_


أنا مش عارفة أعيش .. ولا أتعايش


مش عارفة أتعامل مع الناس.. والله ما عارفة


عندي إحساس رهيب
بالغربة


حاسة إني عايشة في عالم تاني غير اللي الناس عايشين فيه

أنا عارفة إن العيب مش فيك..

لكن
مش عارفة الحل ايه؟!!

بابا.. أنا خايفة.. خايفة أُصاب بالـ"فصام"

خايفة أوي.. لإني شايفاه بيقرّب.. و مش عارفة أعمل حاجة

................................................

كتبتها في مارس 2009


و شوفت محمد صبحي امبارح في "واحد من الناس"


و قال نفس الكلام..

و حسيت أنا بنفس الإحساس






Thursday, May 27, 2010


يا واحداً في ملكه ما له ثاني

يا مَـن إذا قلتُ يا مولاي لبّاني


أعصــاك تسترني..أنسـاك تذكرني

فكيف أنســاك يا مَـن لستَ تنسـاني؟!


ء




Tuesday, May 25, 2010

مش بإيدي


كل ما أقول لنفسي :

"نقطة،، و من أول السطر"

القلم يطفح..و يبـوّظ الصفحة كلها..


اللي اتكتب فيه..

و اللي لسه..أبيض
.
.
.
.

على الهامش :

كان نفسي أقدر أكتب كل حاجة بالرصاص..

كل حاجة







Monday, May 24, 2010

Sunday, May 23, 2010


و كأن الصـُدفــة كــائــن حــيّ

شايفني و سامعني و حاسسني

و..بيعاندني

.
.
.

المفروض أعمل ايه؟







Saturday, May 22, 2010

و..افتكــرت


من حوالي 10 أيام تقريبا كتبت نوت على موبايلي قولت فيها :

"الله يخرب بيت شكل اللي اخترع الصُـدفة

و بالأخص..الصُـدف اللي بتؤذي مشاعرنا بالوحشية دي" *

.
.

بعدها بــ 3 أيام بالظبط كتبت نوت تانية :

"أنا مستعدة أتنازل عن أي صدفة سعيدة في حياتي

حصلت..أو لسه ماحصلتش


في مقابل إني ماتعرضش لأي صُـدفة وِحشة تجرحني

أو تؤذيني و تأثر عليا بالشكل ده"

.
.

أمـا النهارده بأه فـ أنا ليا رأي مختلف شوية :

"أنـا على أتمّ استعداد أدفع جُـزء _مش بسيط_ من عُمري

في مقابل مـحـْــو كلمة "صـُـدفة" من حياتي كلهااااااااااا"

.
.

بجد كده كتيييييير..كتيييييييير يعني

و أنا ما بقتش مستحملة

.........................................................

* أنا آسفة إني كتبت كلام

ماكنتش أحب إنه يتكتب في مدونتي..


بس محدش هايحسّ بيا إلا إذا كان دااااق..زيي







Friday, May 21, 2010


بـثـبـّــت قلبــــي لَـيــودّع


و هــو ما تـمـّــش المشـاويــر





Thursday, May 20, 2010

Tuesday, May 18, 2010

25 :)


بما إني نوّهت امبارح عن بوست النهارده

فا هادخل في الموضوع على طول

عشان غالبا هارغي كتير

و البوست شكله هايطول مني بزيادة


(قال يعني هاحكي حاجات مهمة) ـ

:S

ء كنت مقررة من الأسبوع اللي فات

إني مش هالبس الطقم الجديد غير يوم عيد ميلادي

عشان أبقى متألقة ;)

جيت أول امبارح بالليل قررت فجأة إني مش هالبسه


عشان موودي كان بايظ..
أوي جدا خالص

أول ما فتحت عيني امبارح

رجعت في كلامي..وأنا لسه ع السرير


لأ هالبسه..وهتألق :)..وهاتبسط..وهافرح..


و "مش هاسمح لحاجة ولا لحد ينكد عليا النهارده"


قولت لنفسي صباح الخير

و قومت
و عملت كلللللللل الحاجات اللي بعملها كل يوم الصبح..عادي

لكن بطعم الابتسامة

كل حاجة بعملها و أنا مبتسمة :)


- صباح الخير يا بابا :)

ايه مش هاتقوللي كل سنة وانتي طيبة؟

- الله!! هو النهارده!!

كل سنة وانتي طيبة وعقبال 100 سنة :)

- وانت طيب.. :)

- صباح الخير ........

- ..................

عادي..جت على دي..مفيش مشكلة


"مش هاسمح لحاجة ولا لحد ينكد عليا النهارده"
.
.

نزلت رحت الساقية..أأأأ قصدي الشغل

و داخلة مبتسمة..بردو :)


(على غير العادة..أصلي بتحوّل هناك على طول)

- كل سنة وانتي طيبة

- و انتم كللللكم طيبين..شكراً :)


بس أهم حاجة..محدش يحاول يزعّلني النهارده

- أوك..طلباتك أوامر النهارده (والنهارده بس طبعا :\ )

و إذا بي في نص اليوم شخص ما

ما سمعش التحذير بتاع الصبح بيحاااول..مجرد محاولة..يرخّم عليا

لسه هاتعصّب..و أسخن وكده لقيتني بفكّر نفسي

"مش هاسمح لحاجة ولا لحد ينكد عليا النهارده"

قومت واخدة رد فعل فوري تمام وإديته فوق دماغه..بمنتهى البرود


(الموضوع ده هايتعمل له بوست مخصوص قريب)

خلص الموقف..على خيرررررر
.
.
في نص اليوم طقت في دماغي إني لااااازم أخرج

و أخرج مع حد بحبه

خرجت معاها..واتبسطت..و اتحكى لي (زي ما بحب :) )

و ماحكيتش حاجة (بردو ما زي بحب ):||:) "أيوه وشين عكس بعض..!!")
.
.
ما علينا..خلص اليوم

و خلص معاه الـ 25 سنة اللي فاتوا

ازاي مش عارفة..وامتى مش فاكرة

وفي ايه..مش عايزة أفكّر ولا أفتكر..!!

كفاية إنهم راحوا خلاص..ومش راجعين تاني
.
.
.
أمنيتي للسنة دي..و لبقية السنين :

إن ربنــا يرضى عني

و يراضيني..يراضيني..يراضيني

و مايحرمنيش من طبطبته وحنيته عليا

اللي بيعوّضني بيها عن أي حاجة..وكل حاجة

شكرا يارب على كل حاجة..حلوة أو حلوة بردو (وأنا شايفاها غير كده)

عشان انت مابتعملش حاجة وحشة أبداً :)
.
.
.
بابا حبيبي

أنا بحبك أوي..أوي..أوي

شكرا على البوسة و الحضن بتوع الصبح :)

اللي خلّوا اليوم حلو كده :)

و شكرا ع الطبطبة اللي دايما بتيجي في وقتها

شكرا بجد على إن انت بابا

ربنا يخليك ليا و ما يحرمني منك و يبارك لي في عمرك

:)





Monday, May 17, 2010


لقيت نفسي منشكحة

و مزاجي رايق


فا حبيت أسجـّــل اللحظة التاريخية دي


قبل ما أنام/قبل ما أتعكّر

أصل النهارده عيد ميلادي

كل سنة و أنا طيبة :)

بوست "عيد الميلاد" المجيد....أأأأأ قصدي السعيد
:))

هاكتبه بكرة إن شاء الله

لإني النهارده مفيّصة خالص

تصبحــوا على انشكاح

:D






Friday, May 14, 2010

هــو كــده


اللي هايخاف على زعلي

هاخاف على زعله

و أشيله فوق راسي


غير كده بأه..

الحيطان التخينة مفيش أكتر منها







Thursday, May 13, 2010


يارب

يا تريـّحني في الدنيــا دي

يا تريـّحني منهــا





Monday, May 10, 2010

أي


قالوا زمان :

"يا نحلة لا تقرصيني..ولا عايز عسلك"

و أنا
النهارده بقول :

"يا ست النحلة،،

سايق عليكي النبي

بطّلي قرص فيا و ارحميني بأه


حرااااااااام عليكي أنا خلاص اتهريت

والله العظيم ما طلبت منك عسل..ولا أنا أساساً بحبه


ولا عايزة منك شمع..

ولا عندي استعداد أستشفى بــ [قـَرْصك
*]"

...................................................................


* ثابت علمياً وطبياً فوائد قـرْص النحل و علاجه لبعض الأمراض




Thursday, May 6, 2010

وَجـَــع


بقالي أكتر من ساعة فاتحة الصفحة و مش عارفة أكتب ايه

رغم إني هاموووووووووت وأتكلم

نفسي أحكي..أرغي..أفضّي اللي جوايا في حضن أي حد

مش هاضحك على نفسي و أقول الأحضان كتيييير...بس النِفس اللي تحكي

و لا هاكذب وأقول إني مش لاقية و لا حضن يضمّني

كل اللي أنا عارفاه إني عايزة أتكلم

واللي متأكدة منه جدا إني لو لقيت حد أكلمه

و قعدنا مع بعض..وظبّطنا القعدة..و وشنا في وش بعض

و إيد ع الخـَــد..و استعداد كويس جدا للسَمْــع..

و ها بأه..ياللا احكي..

ايه اللي مضايقك؟ ايه اللي مزعلك؟

ايه اللي خلاكي تنامي معيّطة امبارح؟وخلّى عينيكي بايظة كده طول اليوم النهارده؟

و صوتك مخنوق كده ليه؟ و موودك وِحِش؟

و مضطربة؟ ومش عارفة تتكلمي كلمتين على بعض ولا تقولي جملة مفيدة؟

و أما بتتكلمي شكلك بيبان أوي متغيّر؟

و عاملة نفسك بتضحكي عادي وانتي أساساً فاشلة في التمثيل؟!

و أسئلة كتيييييير تشجّع أي حد _مخنوق أو لأ_ على الفضفضة والحكي
.
.
.
.
.
اللي واثقة منه جدا إن الإجابة هاتكون

صمت..صمت تاااام

و دمــــوع..

و..بــــس





Wednesday, May 5, 2010


يارب


أرجوك

و أتوسل إليك

ماتحطنيش في موقف زي ده تاني

عشان أنا بجد مش حِمل وجع من أي نوع

يارب

شيل من حياتي أي حاجة وحشة

تكون جزء من ذكرى أوحش هاتفضل تلازمني طول حياتي

يااااااارب

ماتعلّقنيش بأي حاجة ماليش نصيب فيها

وثبّتني..خليني جامدة..قوية..وبستحمل

يارب

ارزقني بعد العُسر يُسر

عشان الأعسار كترت أوي

و عشان الحياة بقت أصعب من إني أتحمّلها

و أنا خلاص تعبت