#عن

عن إنك تحلم بحد ماتعرفوش

و تصحى تاني يوم تشوفه

و تبقى عايز تحكي له اللي حصل في الحلم

.
.

عن الحضن اللي ببقى محتاجاه _بشدة_ـ

و مابعرفش أطلبه من بابا

ف بعوّضه بإني أتكور جنبه ع الكنبة

و أحط راسي على رجله
.

و باي ذا واي بأه

عن الحلم اللي حلمته

و الشخص اللي كنت حاطة راسي على رجله

و كل ما أفتكر الحلم دا

تصعب عليا نفسي

و أسبّ و ألعن في عقلي الباطن و الـ.....ـ

اللي بيحطوني في موقف زي ده

 و لو حتى في حلم

.
.

عن قراراتي الغلط اللي باخدها

و مدى بساطة اعترافي بإني 

"آه بغلط..عارفة..أنا مش ملاك"

.
.

عن دماغي اللي فيها ماكينة تفريخ 

ملايين الملايين من الأسئلة اللي مالهاش إجابات

و مليارات المليارات من الأجوبة اللي..بلا أسئلة

.
.

عن إن "راحتي بعدك في وحدتي"ـ

.
.

عن ثنائي "البرد و العتمة"ـ

 و عن الأنين الساكت

.
.

عن كمية البذاءة اللي بلدنا غرقانة فيها

 يخرب بيت كده بجد

أنا عايزة أعيش في كوكب تاني

.
.

عن معجزة إني أعيش المعنى الحرفي لـ

"ثم لا يموت فيها ولا يحيا"

و أنا لسه في الدنيا..و مادخلتش النار

.
.

Déjà vu  عن عرض الـ ديچا ڨو

اليومي..اللي مش باين له آخر

.
.

عن كل راجل ماعرفش يكون راجل

و ياخد قرار صح..في وقت صح

و كسر قلبين..بحجر واحد

.
 .

عن البنت اللي قلبها مكسور 

و عينيها دبلانة

و لسه بتعرف تبتسم للناس العواجيز

و الأطفال الصغيرة..و تلعب معاهم

.
.

عن إني بصحى الصبح كل يوم

أقول يارب

يارب يكون النهارده الجمعة

و مفيش شغل

ومفيش خروج من باب الأوضة

و مفيش اضطرار للتعامل مع البني آدمين

.
.

عن إحساسي بكل حرف في كلمة استغنيت

و اكتشافي إني أيوه فعلا..دا أنا استغنيت

استغنيت تماما

حصل امتى ده؟

.
.

عن مدى الراحة النفسية و الرضا اللي بحسهم

لما بكون في البيت لوحدي

لوحدي تماما حتى لو 3 أيام بس

ياااااااه

ازاي كده؟

.
.

عن السما

ثم السما

ثم السما

عن محمد محرز

ماكنتش أتخيل في يوم من الأيام 

إني ممكن أعمل بوست زي ده

لكن هاقول ايه؟

"يعلم السر و أخفى"

.
.

تليفوني يرن الصبح..برسالة

أفتحها

"محرز استُشهِد في سوريا"

 أهزّ دماغي..أقراها تاني وتالت ورابع..وعاشر

قولت لنفسي

أكيد الجملة دي فيها حاجة غلط

محرز مين؟

اللي باعتلي الرسالة عارف كويس

إني ماعرفش غير شخص واحد بالاسم ده

 استشهد؟

مالهاش غير معنى واحد مافيهوش لَبس

في سوريا؟

الكلمة دي مش هاتفرق خالص

اللي عرف محرز..أو احتك بيه في أي حتة/موقع ع النت

عارف كويس أوي إنها مش غريبة

ممكن نشيل سوريا ونحط بدلها أي مكان/بلد تاني

فيه صراع بين حق وباطل

أي حتة فيها صراع بين حق وباطل

فيها محرز..طبعا بيحارب في جانب الحق

.
.

أول ما استوعبت..حسيت إن قلبي اتخلع

.
.

مين محرز بأه؟

محرز واحد من كام شخصية يتعدّوا على صوابع الإيد الواحدة

اللي باقيين في ذاكرتي من منتدى "شمساوي"ـ

و دا منتدى كنت عضوة فيه من أكتر من 7 سنين

واحد من كام شخصية ربنا وحده يعلم

كمّ الاحترام والتقدير اللي لسه بكنّهم ليهم

رغم عدم وجود أي اتصال مباشر أو غير مباشر بيننا من أكتر من 5 سنين

 من ساعة ما سبت المنتدى نهائيًا

 .
  .

محرز ماينفعش تتحاور معاه مرة

_ و لو حتى ع النت_

و يمرّ في حياتك مرور الكرام

أو حتى تقدر تنسى اسمه

محرز ماينفعش تحتكّ بعقليته/ثقافته/ذكائه

و ماتحسّش أد ايه انت صغير أوي

و دماغك صغيرة..أيًا كان سنك ايه

.
.

لما سمعت صدفة

محمود سعد وهو بيجيب سيرته

بيقول استشهد في سوريا..وكان صحفي

صرخت وقولت: لأ مش صحفي

وماكانش رايح يشتغل

محرز كان رايح يجاهد

 محرز ماكانش عايش وخلاص زي معظمنا

و ماكانش سايب نفسه للدنيا..تودّيه وتجيبه على كيفها

دا كان عارف هو بيعمل ايه

و مقتنع فعلا باللي بيعمله

.
.

أوْضَح حاجة باقية في ذاكرتي عن محرز

إنه كان من أكتر من 5 سنين

حاطط في توقيعه في المنتدى الآية دي:ـ

مِنَ الْمُؤْمِنِينَ رِجَالٌ صَدَقُوا مَا عَاهَدُوا اللَّهَ عَلَيْهِ 

فَمِنْهُم مَّن قَضَى نَحْبَهُ وَمِنْهُم مَّن يَنتَظِرُ وَمَا بَدَّلُوا تَبْدِيلا

سبحان الله العليّ العظيم

و انت يا محمد كنت كده

انتظرت..لحد ما قضيت نحبك

  طيّب الله ثراك..و رزقك الفردوس الأعلى

.
.

النهارده وأنا بصلّي الظُهر

فكرت أدعي له

بس لساني اتعقد

هادعيله بإيه و هو خلاص وصل للي كان دايما بيتمناه؟

نال الشهادة في سبيل الله

على إيد قناص من جيش سفّاح سوريا

.

أدعيله ازاي و احنا اللي محتاجين لدعائه؟

ربنا يصبر أهله و زوجته و طفلته

ويربط على قلوبهم

.
.

أنا مش عارفة أقول ايه

إن لله ما أخذ..و لله ما أعطى

و كل شيء عنده بأجل مسمّى

ولا حول ولا قوة إلا بالله





 

يمكن

 
لحكمة ما أجهلها تماما

يمكن ربنا حابب يسمع صوت أنيني

دعوة مستعجلة

يارب

احرق قلب كل كلب قاعد على كرسي في البلد دي

احرق قلب كل كلب مسؤول عن نقطة دم تنزل من أي مصري

احرق قلب كل كلب مسؤول عن أي دمعة

تنزل من عين أم..حزن على ابنها

يارب

دوّقهم من نفس الكاس

اللي بيشرب منه أهالي الشهداء

و المصابين..و المسحولين..و المفقودين

و البنات/الستات اللي كرامتهم بتتهان في الميدان

يارب

احرق قلبهم على عيالهم

و ورّينا فيهم اللي بنشوفه كل يوم

يارب

ماتخليهمش يموتوا

من غير ما يتعذبوا في الدنيا قبل الآخرة

.
 . 

يارب

احنا كل مايقع مننا واحد بنهتف

"يا نجيب حقّهم..يا نموت زيهم"

و عمرنا ما عرفنا نجيب حقهم

كل اللي بيحصل بس إننا بنموت زيهم

يارب

إنّا مغلوبون فانتصر





  

قرف

 ياللي انتي الموت عشانك

أهون من العِيشة فيكي

.
.
.

أسامة عبد الصبور