Saturday, July 26, 2008


ليه يا بنفسج بتبهج و انت زهر حزين؟؟

و العين تتابعك .. و طبعك محتشم و رزين

ليه يا بنفسج بتبهج؟ ليه يا بنفسج؟

بتبهج .. و انت زهر حزين؟!


~ ~ ~ ~ ~ ~ ~ ~ ~ ~
~ ~ ~ بيــرم ~ ~ ~
~ التونسـي ~
~ ~
~


ء


Thursday, July 24, 2008


كفاية عليا أشوف الفرحة دي في عينيكي

و أحسها في صوتك

ربنا يتم عليكي نعمته

و يارب .. يارب .. يارب

يفرح قلبك دايما .. و يفرحني لفرحتك

خلاص .. دلوقتي مابقتش زعلانة! :)

...........................

بس لسه وحشاني


Sunday, July 20, 2008

من القـلـب


مش عارفة أبدأ منين؟

من زمااااان .. أيام ما كنا مابنستويش في حلة ،

وللا أما كبرنا .. و بقينا نفهم بعض من نظرة عينينا؟

خلاص .. أنا هاكتب و الكلام هايجيب بعضه .

..............................

مش قادرة أتخيل فكرة إن اتنين أخوات يعيشوا مع بعض أكتر من 23 سنة


يتربوا سوا .. و يكبروا سوا .. و ينضجوا سوا

و فجأة ..


فجأة واحدة منهم تفتح عينيها الصبح ماتلاقيش التانية معاها في البيت

اتجوزت ..

بقى ليها بيت تاني غير بيتها .. وناس تانية غير ناسها


و المفروض طبعا إن ده عادي .. سنة الحياة


المفروض بردو إن الواحدة دي تتعود على كده

المفروض نفسيتها ما تتعبش ولا أعصابها تتلف

المفروض ما يجيلهاش اكتئاب

المفروض ماتعيطش .. أصلها مابقتش صغيرة على التفاهات دي

المفروض تعيش لوحدها في الدنيا .. مع باباها و مامتها

المفروض .. و المفروض .. و المفروض

مفروضات كتير أوي مش عارفة مين فرضها؟

و فرضها امتى؟ و ليه؟ و على مين؟

..........................................

النهارده و أنا راجعة من الشغل كل ده كان بيدور في دماغي


كل ما أحاول أفكر في حاجة تانية ماعرفش .. و عينيا تدمع أكتر


مش متخيلة إني هارجع البيت مش هالاقيكي ..

مش هالاقيكي نايمة على الكنبة اللي في الصالة


و تقعدي تناغشي فيا .. و أنا راجعة من الشغل قرفانة


ترخمي عليا و أنا حرانة .. تقعدي تنكشيني لحد ما أفك


و كل واحدة تبدأ تحكي للتانية عن يومها و أحداثه .. و الشغل ..

و الدنيا .. و الناس بقت عاملة ازاي

كنا دايما نصبّر بعض .. و نقول اللي زينا خلاص انقرضوا


احنا نشوفلنا كوكب تاني نعيش فيه ..

بعيد عن الشر و الحقد و الحسد و الخبث

و كل الصفات البغيضة اللي انتشرت بين الناس انتشار النار في الهشيم

و في الآخر نقول في نفس واحد : "ربنا يخرجنا منها على خير "

حاولت النهارده أدور على أي مشوار أروحه عشان يأخرني شوية عن رجوعي للبيت

طب النهارده لقيت مشوار يأخرني ربع ساعة

طب و بكرة؟ طب و كل يوم؟ و آخرتها؟


مانا كده كده هارجع البيت و مش هالاقيكي

دخلته و أنا مش عايزة أدخل


مش عايزة ماما تشوفني و أنا مدمعة .. ولا بابا


هما مش ناقصين

حاسة إنه مابقاش فيه روح
.

.............................................


أول مرة أحس إن آخر العنقود مظلوم !!


طول عمري شايفة غير كده

ماشوفتش غير الدلع و الحنية و الحب الكبير من الكل

مظلوم أيوه .. كل اللي بيحبهم بيسيبوه .. واحد ورا التاني


و بردو "المفروض" يأقلم نفسه على كل الأوضاع الجديدة


مش مهم هو موافق وللا لأ؟ راضي وللا لأ؟

هايعيش ازاي بعد كده؟

مش مهم أي حاجة .. مش مهم كل حاجة .


...........................................

هنام ازاي لوحدي في الأوضة؟


أنا مش بخاف زي مانتي عارفة .. بس مش هاعرف ..

بجد ماعرفتش أنام الليلتين اللي فاتوا

هاعمل ايه طيب في اللي جاي؟


مش هاقول غير : ربنا يهوّن


لإنه أدرى واحد بيا و بحالتي


مش عايزة أصعب على حد .. غيرك


أيوه .. عايزة أصعب عليكي انتي بس


عشان تسألي عني و تحسي بيا
..

و بكمية الفراغ الرهيبة اللي سبتيهالي


مش عشان تضايقي و الله


بس عشان تسألي عليا


ربنا يفرح قلبك .. و يسعد أيامك كلها


و حياتك الجديدة تكون أحسن من اللي فاتت


......................


وحشتيني



Sunday, July 13, 2008

قطــوف

ء

أيها الفقير: صبرٌ جميل , فقد سلمت من تبعات المال , و خدمة الثروة , و عناء الجمع ، ومشقة و حراسة المال وخدمته و طول الحساب عند الله .

******

• يا أيها المريض: طهور إن شاء الله فقد هُذبت من الخطايا , و نُقيت من الذنوب , و صُقل قلبك وانكسرت نفسك , و ذهب كبرك و عجبك .

******

• لماذا تفكر في المفقود و لا تشكر على الموجود؟ و تنسى النعمة الحاضرة و تتحسر على النعمة الغائبة؟ و تحسد الناس و تغفل عما لديك؟

******

• كن كالنملة في المثابرة , فإنها تصعد الشجرة مائة مرة و تسقط ثم تعود صاعدة حتى تصل , و لا تكل و لا تمل .

******

• و كن كالنملة فإنها تأكل طيباً و تضع طيباً و إذا وقعت على عود لم تكسره و على زهرة لا تخدشها.

******

• (وَسَارِعُوا)(آل عمران: من الآية133) ثب وثباً إلى العلياء فإن المجد مناهيه , و لن يقدم النصر على أقدام من ذهب و لكن مع دموع و دماء و سهر و نصب و جوع و مشقة .

******

• عرق العامل أزكى من مسك القاعد , و زفرات الكادح أجمل من أناشيد الكسول , و رغيف الجائع ألذ من خروف المترف .

******

• لا تتهيب المصاعب فإن الأسد يواجه القطيع من الجمال غير هياب , و لا تشك المتاعب فإن الحمار يحمل الأثقال و لا يئن , و لا تضجر من مطلبك ؛ فإن الكلب يطارد فريسته و لو في النار .

******

• لا تظن العاهات تمنعك من بلوغ الغايات , فكم من فاضل حاز المجد وهو أعمى أو أصم أو أشل أو أعرج , فالمسألة مسألة همم لا أجسام .

******

• عسى أن يكون منعه لك _سبحانه_ عطاء ، و حجزك عن رغبتك لطف , و تأخرك عن مرادك عناية , فإنه أبصر بك منك .

******

• إذا زارتك شدة فاعلم أنها سحابة صيف عن قليل تقشع , و لا يخيفك رعدها و لا يرهبك برقها فربما كانت محملة بالغيث .

******

• الأعمى يتمنى أن يشاهد العالم , و الأصم يتمنى سماع الأصوات , و المقعد يتمنى المشي خطوات , و الأبكم يتمنى أن يقول كلمات , و أنت تشاهد و تسمع و تتكلم .

******

• لا تظن أن الحياة كملت لأحد , من عنده بيت ليس عنده سيارة , و من عنده زوجة ليس عنده وظيفة , و من عنده شهية قد لا يجد الطعام , و من عنده المأكولات فقد منع من الأكل.

******

• الطائر لا يأتيه رزقه في العش , و الأسد لا تقدم له وجبته في العرين , و النملة لا تعطي طعامها في مسكنها , ولكن كلهم يطلبون و يبحثون فاطلب كما طلبوا ؛ تجد كما وجدوا .

******

• كل مأساة تصيبك فهي درس لا ينسى , و كل مصيبة تصيبك فهي محفورة في ذاكرتك , و لهذا هي النصوص الباقية في الذهن .

******

هنيئاً لمن بات و الناس يدعون له , و ويل لمن نام و الناس يدعون عليه , و بشرى لمن أحبته القلوب , و خسارة لمن لعنته الألسن .

.........................................

عائـض القرنـي




Thursday, July 10, 2008

Wednesday, July 2, 2008

حـالـة كـده


معرفش ليه ..
تنحت للدنيا كده ..
فجأة لقيتني مسكون بالملل ..
لاعندي رغبة ف البكا ..
و لا في الكلام ..
و لا عايز أنام ..
و لا حتي بسأل إيه ده ليه ..
و آخرتها إيه ..
و إيه العمل ..
حالة كده ..
معرفش ايه؟!
و أخاف أقول لأي حد ..
لحسن يقوم يقلبها جد ..
حد صاحبي ينزعج ..
يمد إيده جوه قلبه من باب الكرم ..
عشان يشاركني الألم ..
أو يستلفلي من لئيم حبة أمل ..
حالة كده ..
مالهاش معاد ..
ساعات تزورني ف الربيع ..
ف الحر ..
و ف عز الشتا ..
وتجيب حاجات ..
لا فيها روح ولا ميتة ..
حالة كده ..
معرفش ايه؟!
لا معاها تنفع كلمتين و لا غنوتين ..
و لا لقطة من ألبوم صور ..
و ألاقي قلبي ف الهوا ويا الكور ..
أخاف أقول لأي حد ...
لحسن يقوم يقلبها جد ..
حالة كده ..
معرفش إيه؟!
لكني برجع منها بعد السكات ..
فاكر شوية ..
فاهم شويه ف اللي فات ..
حاسس أوي بحضن الصحاب ...
محظوظ أنا ..
ساعات بشاور ..
ينفتحلي ألف باب ..
لكني برجع ..
و بغلط ف الحساب ..
و معرفش ليه ..
تنحت للدنيا كده !!

...............................

علي سلامة