أنا عايـزة من ده

بحب أوي ملامح الناس الكبيرة..العجوزة

الوش المكرمش..والعيون اللي لوّنها الزمن..

و الإيدين اللي نقشها النمش بلون الشمس..

الإيد الحنينة اللي اتعودت تطبطب على الصغير و الكبير..محتاج أو مش محتاج..

الابتسامة الصافية اللي تحسّسك إن الدنيا لسه بخير..

و إن فيه أمل إنك توصل للسن ده وقلبك لسه فيه مكان للفرح..

و لسه عندك القدرة على الابتسام..

رغم الشروخ اللي ملت قلبك بفعل الزمن والناس..

و عمايلهم اللي تهد جبال..
.
.
بحسّ في ملامحهم بطيبة وحنية مالهاش حدود..

كان نفسي أوي يبقى عندي تيتة أو جدو.. :(

عشان وقت ما الدنيا تضيق بيا ألاقي حد أهرب من الحزن

و أروح له..أترمي في حضنه..

يطبطب عليا..يبقى فاهمني من غير ما أحكي..

أنا مش عايزة أحكي..أو مش عارفة..مش عارفة

محتاجة حضن حنيّن أترمي فيه..وإيد أحنّ تطبطب عليا..

أجيب منين أنا دلوقتي تيتة أو جدو؟؟

:(