تأملات

وَلَوْ بَسَطَ اللَّهُ الرِّزْقَ لِعِبَادِهِ لَبَغَوْا فِي الأَرْضِ
وَلَكِن يُنَزِّلُ بِقَدَرٍ مَّا يَشَاءُ إِنَّهُ بِعِبَادِهِ خَبِيرٌ بَصِيرٌ

سمعتها من يومين الصبح..فضلت أفكر فيها كتير
وقعدت أحلل فيها وأفسرها _ببساطة :)_ لنفسي
و سبحان الله فعلا..وصلت لإيه؟
شوفت ناس ربنا وسّـع عليها في الرزق..واتغيّرت للأسوأ
و ناس تانية ربنا كرمهم بالزواج والذرية الصالحة..واتنمردوا وجحدوا بنعمة ربنا
وغيرهم في حاجات تانية كتير..وبردو ماحمدوش ربنا وفسدت أخلاقهم وأفسدوا في الأرض
تخيلت إنهم لو كانوا يعرفوا التغير اللي هايحصل لهم بعد ما ربنا وسّعها عليهم
ماكانوش حبّوا إن أحوالهم تتغير بالشكل ده
و لو كانوا اتخيّروا بين استقرارهم في أحوالهم الضيقة_شوية_ مع احتفاظهم بالرضا والقناعة بقضاء ربنا
وبين الرزق الواسع _أيّاً كان نوعه_ و التغير للأسوأ في الأخلاق عموما و في علاقتهم بربنا خصوصاً
يا ترى كانوا اختاروا ايه؟
أنا لو مكانهم هختار الوضع الأول..وهارضى برزقي اللي ربنا كتبهولي
طبعا أنا بتكلم ببساطة لأني خارج الوضع تماماً
بس بردو مقتنعة و مؤمنة تمام الإيمان بقدرة ربنا على توزيع الأرزاق
عشان كده "يُنَزِّلُ بِقَدَرٍ مَّا يَشَاءُ"
مهو مفيش حد أدرى منه بطاقة كل واحد مننا على الاحتمال
سواء احتمال قلة الرزق أو زيادته
مهو ربي "بِعِبَادِهِ خَبِيرٌ بَصِيرٌ" !!
..................................................
* توضيح :
"أنا طبعا مش بربط سِعة الرزق بالفساد"!
...............................................................

على الهامش :
راضية يارب
:)