فترة طويلة عدت
ماكتبتش فيها
جوايا كلام كتير أوي..أوي بجد
مش عارفة ليه مش عارفة أعبر عنه..!
يمكن عشان فضلت فترة كبيرة بكتب عن مشاعر سلبية..
نسيت إزاي أعبّر عن الحاجات الحلوة
يمكن عشان عشت كتير في الضلمة..
نسيت طعم النور..!
أو يمكن ماتعرّضتش لكمية النور اللي اتعرّضت لها الفترة اللي فاتت..
عشان كده الموضوع بالنسبة لي مختلف
مش عارفة السبب تحديدًا..!
.
.
كلام كتير وأحاسيس حلوة
كلام عن "ربــي"..اللي هو ربنا كلنا طبعا
بس أنا بحب أوي الكلمة دي "ربــي"
بحس بقربه وأنا بقولها..أو بكتبها
بحس إنه معايا "أوي"
"ربــي" اللي عارف كويس أوي
بيعمل ايه؟ لمين؟ و امتى؟ وفين؟ و ازاي؟
و "ليــه"؟!!!
بغض النظر احنا فهمنا الحكمة في وقتها أو بعدها
أو حتى مافهمناش خالص..!
اللي هو تأكيدًا لمعنى:
"إِنَّا كُلَّ شَيْءٍ خَلَقْنَاهُ بِقَدَرٍ"
.
.
كلام عن الـ "ونـس" اللي افتقدته لفترة طويلة..جدا
وكنت بدوّر عليه حواليا ومش عارفة منين أوصل له
أتاري ليه طريق واحد..كنت بعيدة عنه إلى حد كبير..
الـ "ونـس" اللي وصلني دلوقتي لمرحلة:
"وحدي لكن ونسان وماشي كده"
.
.
كلام عن "الطبطبات الإلهية" اللي بتيجي في وقتها
عن الإشارات اللي بتتبعت طول الوقت
وعن بعضها اللي بيتلقط...
وكتييييير منها اللي بيقع جهل أو سهو..أو قلة تركيز..!
.
.
كلام عن "الحُضن الرباني" اللي دوقت طعمه..
و عرفت قيمته
واتأكدت إن مفييييش أي حاجة على وجه الأرض
ممكن تعوضه..أو حتى تتقارن بيه
"الحُضن الرباني" اللي ماينفعش تسأل يعني ايه ده؟
اللي ماينفعش غير إن ربك يختارك انت
دونًا عن بقية البشر عشان يوهبه لك
في الوقت اللي هو يحدده..ويشوفه الأنسب لك..
بغض النظر عن انت شايف ايه..
لأنك أساسا ماتعرفش حاجة..
هو اللي عارف كل حاجة..
عارفك أكتر منك..
فاهم يعني ايه؟
يعني:
"وَنَحْنُ أَقْرَبُ إِلَيْهِ مِنْ حَبْلِ الْوَرِيدِ"
.
.
لحد كده أنا عبّرت في نقط عن اللي عايزة أكتب عنه..
وعارفة إني مش هاعرف أفصّل أكتر من كده..
لإني في الحقيقة مش عارفة أوصف اللي جوايا..
.
.
ماعنديش كلمة أختم بيها أحلى من:
"لك الحمـد كونـك ربـي"
ـ
