عـن الضمــير

اكتشفت مؤخرا خطأ فادح في مبدأ من أساسيات حياتي

كنت دايما فاكرة إن مبدأ "أنـا سايباك لضميرك"

بيعمل عمايل .. و يسوي الهوايل

لكن للأسف _وعن تجربة_ أثبت فشل ذريع في المعاملات الإنسانية

فا نصيحة لوجه الله تعالى

اللي منكم لسه على نياته و مؤمن بصحة المبدأ ده

يحاول يفوّق نفسه من دلوقتي ..

بدل ما ياخد ضربة جامدة .. تفوّقه .. و توجعه


الظاهر الأزمة بتزيد و كل يوم تشمل قيمة جديدة في حياتنا

و العقد حباته بتنفرط حبة ورا حبة

بدايةً بالإنسانية .. مروراً بالحرية .. ثم الكرامة

و أخيراً _وليس آخراً_ الضمـــير

.......................................................

سبحان من يخلي ضميري يأنبني على حاجات

لو اتقالت لناس معينة تتوصف بإنها تافهة

سبحان من يخليني أقعد ألوم في نفسي يومين

لإن واحدة صاحبتي كلمتني و أنا في الشغل

و كنت مضغوطة جامد .. و مجرد إن صوتي كان واطي شوية وهادي

خلاها تحس إني مش عارفاها أو مش مسيّـفة رقهما!!

سبحان من يخليني أتقلب على السرير بالليل ساعتين تلاتة

و ألوم نفسي على هزاري مع صاحبتي

أقول لنفسي ماكانش المفروض أقولها كده _رغم إنه تهريج_ و هي ضحكت على كلمتي

طب ممكن تكون زعلت؟ ممكن أكون سبتها تنام زعلانة مني؟

و على الجانب الآخر

تلاقي حد _بمنتهى البساطة و اليُـسْـر_ يجور على حقك

يكذب عشان يوصل للي هو عايزه _على حسابك طبعا_

يخلف وعده معاك لمجرد إن مصلحته تتعارض مع الوعد ده

يخون أمانة أمّنتها له في يوم من الأيام .. وشددت عليه إنها أمانة

×××××××××××××

فسبحان ذي الجبروت و الملكوت و العظمة و الكبرياء

لــه فـي خَـلقـِــه شـــؤون

!!!!

مرض عصري

من يومين و أنا راجعة من الشغل

كنت بتفكر في حال الدنيا ..

_كالعادة يعني في الوقت ده_

مش عارفة ليه حسيت ..

حسيت إن لما نِـعَـم ربنا بتزيد علينا .. بتزيد أوي يعني

بنتغير

بنتغير و احنا مش حاسين

أكيد بنحمد ربنا .. تلقائياً كده

بس حاسة إن الحمد و الشكر ده مابقاش طالع من القلب

يعني بقى اعتياد على النِـعَـم و الكَـرَم

و من ثَـم ... اعتياد على الشكر

مابقاش شكر مقترن بفرحة ..

فرحة بالحاجة اللي كنا بنتمناها و مستنيينها

بقى عادي يعني .. أكيد راضيين .. لكن مش مبسوطين زي الأول

لحد هنا كويس ... مش كويس أوي طبعا

المشكلة في اللي بعد كده

بنُـصاب بــ : "البَــطـَـــر"

.......................................

زمان كنت أقول

نفسي أوي في الحاجة الفلانية ..

يااااااه لو تتحقق .. دانا هطييير من الفرحة

و يوم ما تتحقق فعلا أبقى مبسوطة أوي

يومين تلاتة و الفرحة تذبل .. و تبقى كل حاجة عادي!

و يبدأ التعود على الحاجة دي ... "النعمة المُـتمنّــاة .. سابقاً" !!

الشيطان _قرف يقرفه_ طبعا بيعمل شغل جامد ..

واحدة واحدة يبدأ الملل يتسرب لحياتي

و أبدأ أكره الحاجة دي

و أفكر في نعمة تانية مش موجودة ..أتمناها

و هكذا .. دواليك

*********************************

و كل فترة .. أما ييجي وقت المحاسبة

يبدأ العتاب .. و الندم ..

ثم الرضــا التـــام

ثم الحمــد و الشكــر

**حبيت بس أقول خلوا بالكم من النعم اللي في إيديكم

و حافظوا عليها بجد ..

حافظوا أكتر على التفكير فيها و "محاولة" حصرها

ربنا يعافينا من البطر .. و يرضينا بما منحنا

وصدق رسول الله _صلى الله عليه و سلم_ حين قال :

"... والحمد لله تملأ الميزان ..."

**********************


على الهامش :

بقيت أكره كلمـة : عــــــادي

و بقيت أعشق كلمة : الحمــــد لله

:)

يـوم ميـلادي

أنـا شاب لكن عمري ألف عام

وحيد لكن بين ضلوعي زحام

خايف و لكن خوفي مني أنـا

أخرس و لكن قلبي مليان كلام

عجبي !!!!

********************

زي النهارده

17/05/1985

يوم الجمعة .. بعد الصلاة مباشرةً

طلعت مني أول صرخة .. صرخة الحياة

و ياريتها ما .....

ما علينا

رغم كل شيء

كل سنة و أنــا طيبة

و أحسن من السنة اللي قبلها

كل سنة و أنــا بخير

و ربنا راضي عني أكتر من أي سنة فاتت

********************

على رأي دينا

على الهامش :

بحاول لسه أستوعب إني وصلت لسن الــ 23

بحاول أقنع نفسي إني بقيت شابة .. في ريعان شبابي

بحاول بردو أفتكر أي حاجة كويسة عملتها في الـ 23 سنة اللي فاتوا

أي حاجة تقنعني إني ليا وجود .. و فيه فايدة من وجودي ده

جَرعة تفاؤل و أمل .. مش أكتر

************************

ياللا بأه

عايزة حبة دعوات كده تريح البال .. و تفرح القلب

:)

**********************

تحديث :

مش عارفة ليه عينيا دمعت و احنا بنطفي الشمع؟

خروجاً على القاعدة

مش عاجبني حاجة ... لا شغل مرتاحة ولا اجازة مرتاحة

جوه ... قعدة البيت بتخنقني و تجيب لي اكتئاب

بره ... الأشخاص أصلا بقوا لا يُطاقوا

و المناظر في الشوارع و المترو غير محتملة

بجد بتتعبلي أعصابي

المفروض إني أشوف العيب و الغلط و الحرام و أسكت؟

طب مين هايسمع لي .. وللا مين هايسمح لي؟!!

*******************

حاسة إني بقيت كائن فضائي أقرب مني للبني آدمين

لأسباب كتييييير كتيييييير

أهونها ... أهونها بجد و بلا مبالغة

الكهربا اللي في جسمي

بتكهرب من أي حاجة عازلة مابتكهربش

بتكهرب من الأشخاص و بيتكهربوا مني

اتكهربت من محمد ... طفل ماكملش شهر ... حد يصدقها دي؟!!

قال ايه كل ده تهيؤات

أروح أكشف .. الدكتور يقوللي كهربيني ياللا .... بمزاجي أصلي

بدوس ع الزرار أكهرب و أتكهرب

و شوية يقوللي عادي ... أنا كمان بتكهرب

ماتلبسيش حاجة فيها قماش صناعي ... حاولي تلبسي أقطان

هو أنا أصلا لاقية لبس في المحلات؟

ايه اللبس المسخرة ده؟ بقى ده ينفع للخروج؟

بجد منتهى قلة الأدب !!

نفسي أعرف مين البني آدم المحترم اللي مصمم الأزياء الحشمة دي!!

يعني ينفع أنزل 4 مرات ألف على لبس و أرجع إيدي فاضية؟

خلاص هاطقّ

ايه يعني؟ كل الناس قلعت خلاص؟

طب مش هاقلع بأه !!

و هافضل ألبس في الهدوم اللي عندي إلى ما شاء الله

طب أعمل ايه؟ هاستحمل؟

أنا عارفة نفسي ... كبيري شهر كمان و خلاص هاتمرد على كل اللي عندي

دا إذا كملته !!

*********************

كل أسبوع أقول يوم الأجازة هاكلم فلانة و فلانة و فلانة

وحشوني أوي ... بقالنا كتير ماتكلمناش

و هما اللي بيسألوا عني .. و أنا مشغولة عنهم

ييجي آخر الأسبوع و ماكلمش حد

ياترى أنا فعلا مشغولة عنهم؟

وللا ماليش نفس أكلم حد ... حتى الناس اللي وحشاني؟

مابقتش عارفة مالي ... ولا عارفة أنا عايزة ايه !!

***********************

كل اللي في دماغكم الخطوبة و الجواز ... و سنين الجواز

الأسئلة البايخة السقيلة

ايه مفيش جديد؟

لسه مفيش حاجة في السكة؟

مفيش أخبار؟

و الغمز و اللمز و الذي منه :\

ايه يا بشرررررررر؟

دا أنا ماكملتش 23 سنة

و بعدين مابحبش حد يتدخل في حياتي

احترموا بأه خصوصية الناس

و اررررررررحمووووووونييييييييييي

***********************

ما ترسيلك على بر بأه!!

عايزة وللا مش عايزة؟

شوية آه نفسي و يا سلااااااام لو ده حصل

و شوية لأ .. أنا كده كويسة ... مرتاحة

مع إني لا مرتاحة ولا حاجة

و بجد منتهى الخنقة يعني!!

***********************

زعلانة مني أويييييييي .. زعلانة بجد و مش طايقاني

و مش عارفة ازاي بقيت كده؟!!

أنا بعد كده مش هاسكت لي .. و هاديني على دماغي

عشان الحال ده مش عاجبني

***********************

عارفة إنك زعلان مني .. و مكسوفة من نفسي بجد

و حزينة .. حزينة جدا :(

حاسة إني متكتفة

و مستوى الإرادة عندي دلوقتي بقى تحت الصفر

************************

نفسي أولع في البلد دي بأه .. نفسي

خلاص طهقت من اللي بيحصل ده

كل يوم بلوى جديدة ... و مصيبة كبيرة

و الناس ساكتة و خانعة و بتاخد على دماغها و تقول كمان

بجد الحكاية زادت عن حدها أوي ... فاقت كل الحدود

بلد بجد بقت عايزة تسونامي وللا نارجيس يفوقها

دا إذا فاقت كمان!!

******************************

خلاص قررت إني أقول كل اللي في نفسي بعد كده هنا

أمال أنا عاملة المدونة دي ليه؟

عشان أقعد أكتب في حاجات و أعملها درافت؟!!

طب و الناس الطيبة اللي بتحبني و تيجي تقرالي ذنبها ايه؟

مش عارفة بأه

أنا طهقانة و ملّانة جداااااااا و مخنوقة و على آخري

و مش عارفة أنا بكتب ايه دلوقتي

.سامحوني.

تاج الملوك

This Tag is From Bongo & Yuki , امرأة من زمن الحب

The Rules that most of you already know

• Post 10 random things about yourself !
  
• Choose 5 people to tag and a reason you chose each person.
• Leave them each a comment directing them to your blog so they know they are it.
• You can’t tag the person who tagged you (you’ll have to make new friends).
• As a courtesy to the person who tagged you, please let them know when you have posted so they can have the sheer delight and extra work load of reading your answers).

بعد عدة مناقشات مطولة ومربعة و مسدسة بيني و بين يوكي

عن اللغة اللي هجاوب بيها التاج

هي تقوللي يوناني .. و أنا أقولها ياباني

وبما إني أكيد يعني مش هجاوبه بالإيطالي

مهو مش هايبقى إيطالي في الشغل .. وكمان في المدونة

وبما إن الأسباني طاااااار من ساعة ما خلصت دراسة :(

وبما إن الانجليزي بتاعي بعافية شوية

و واخد على خاطره مني من ساعة ما اتخليت عنه

و درست لغتين غيره في الكلية

قررت إني أجاوبه بالعربي .. لغتنا الأم

هو فيه أحلى من كده؟ :)

ياللا .. بسم الله

1- بحب أصحابي أوي أوي أوي .. لأبعد الحدود .. و بحب فيا ده .. وهما كمان :)

لدرجة إني بندمج معاهم و أكون على راحتي أكتر ما بكون مع قرايبي

**

2- بحرص دايما على إني أعمل حدود بيني و بين الناس .. بحترم الناس اللي بتقدّر ده وتعتبره حرية شخصية .. وماحبش حد_ماعرفوش_ ياخد عليا بسرعة .. أو يتخطى الحدود دي .. عشان غالبا بيجد ما لا يرضيه :|

**

3- بحب الباليه و الجمباز جدا .. كنت بلعب جمباز زمان و أخدت فيه مراكز .. بس أما كبرت ماكملتش .. ولحد دلوقتي لو لقيت أي بطولة جمباز أو عرض باليه في التليفزيون أحب جدا أتفرج عليهم :)

**

4- بحب بلدي أوي أوي .. و زعلانة منها جدااااا .. زعلانة بجد و متأثرة ... لكن زعلانة عليها أكتر و أكتر !

**

5- بخااااااف من كل الكائنات الحية .. عدا البني آدمين _بس خلاص قربوا يدخلوا في الليستا هما كمان :\_ اترعب لو قربت مني قطة أو كلب أو عصفورة أو حمامة أو أي كائن حي .. ممكن لو قاعدة في مكان و لقيت نملة ماشية على هدومي أو حتى بتقرب مني أقوم أتنطر من مكاني .. أحب أتابعهم من بعيد و أشوف حركاتهم و ردود أفعالهم .. لكن يقربوا مني ......

مش عارفة سببها ايه الفوبيا دي !! :|

**

6- بحب سورة "غافر" جداااااااااا .. بحبها وبعيش معاها آية بآية .. و سورة "ق" كمان

**

7- بتخنق من الأماكن المقفولة .. حتى لو كانت فاضية ..

أحب أي مكان مفتوح فيه هوا و سما و عصافير .. و حاجات أشوفها على مرمى البصر .. وأسرح معاها

**

8- بحب السفر أوي .. وبحب البحر .. بحب أتكلم معاه جدا .. يمكن من أكتر اللحظات اللي ببقى صريحة فيها مع نفسي و مابتكسفش أفضفض و أطلع اللي جوايا بيبقى الوقت اللي قاعدة فيه أدامه .. لو ينفع ده يدخل ضمن الهوايات يبقى هو أولها

**

9- كبرت في السنتين اللي فاتوا اللي ماكبرتوش في 10 سنين .. ممكن أقول نضجت فيهم

ومؤخرا ... بقيت أحب الحياة جدا ... و اكتشفت فيها حاجات حلوة كتير ماكنتش عارفاها

ربنا يديمها نعمة ! :)

**

10 - فيا صفات كتير متناقضة ... و غالبا محدش بيقدر يتوقع رد فعلي لأي حاجة .. و بردو بحب فيا ده :)

.....................

* مش بعرف أتكلم عن نفسي خالص ولا حتى بيني و بين نفسي ... و جمعت الـ 10 حاجات دول بالعاااافية

بجد التاج ده أخد مني مجهود جامد

........................

* تقريبا ده أطول بوست كتبته من ساعة ما عملت المدونة .. كتبت كل ده ازاااي؟ مش عارفة

الحمد لله إنه عدى على خير .. رغم إني عارفة إن شكله ملخبط و عجيب !

.............

أمرره لــ :

جيداء
(لما تفتح بابها من تاني)

تسنيم
(لما ترجع لنا بألف خير وسلامة)

دينا

موودي

رئيس جمهورية نفسه

...................................

* باربي :

ماتقلقيش على التاج بتاعك .. أكيد هاينزل في يوم من الأيام

بس أحب أقولك إن التاج اللي فوق ده فضل أسبوعين على ما استجمعت شجاعتي و جاوبته .. وأكتر من أسبوع عشان أظبطه و أنزله

:D ! يعني خلي عندك أمل