Friday, March 23, 2012

ح ن ي ن


بدايةً

خلينا متفقين إن الحنين

يولّد ارتكاب الحماقات

الواحدة تلو الأخرى

أبسطها مثلا إني أخلف عهدي مع نفسي

إني ماجبش سيرتك تاني _حتى مع نفسي_ـ

أو أكتب عنك هنا..أو في نوت ع الموبايل

و أقصاها _الحمد لله_ ماوصلتلوش لسه لإني ماعرفوش

وبين أدناها و أقصاها..شوية حاجات كده

!

بغض النظر عن شكل حياة كل حد فينا دلوقتي

أو مدى إحساسنا بالرضا عنها

لازم أعترف بشوية حاجات تانية مالهاش أي لازمة

خلينا متفقين _بردو!_ إنها مش هاتقدم

لكنها _أكيد_ هاتأخر مرحلة الشفا

(هأ!..الشفا!!!!ـ)

اللي ولا أعرف لها طريق جُرة

بمناسبة الشفا بأه

خلينا نركن الاعتراف بالحقايق المزعومة على جنب كده

و نتكلم عن المرجيحة..أو....الشفا

.
.

فترة طويلة عدّت

حاسة إني صحيت فجأة لقيتني راكبة مرجيحة

بتمرجح فيها..لكن ببطء غريب

يمينها أيام..وشمالها أيام

لكنّها مابتقفش

يمينها أحس إني زي مانا من سنة

وكأن ولا حاجة اتغيرت

فاكرة كل حاجة بتفاصيلها..بتفاصيل تفاصيلها

كإننا كنا لسه امبارح

و شمالها أحس إني خفيت منك فعلا

وخفيت معاك من كل حاجة

كل حاجة تخليني أحس إني بني آدمة

و زهدت كل حاجة متعلقة بالحياة

لدرجة إني ساعات بحس إني بقيت مجرد جماد

جماد..بس بيتنفس

المشكلة إن المرجيحة مابتقفش في النص

وضعها التالت إنها تنطرني بعيد لحفرة

مدة إقامتي فيها _بردو_ أيام

حفرة عميقة..ليلها غميق

مافيهاش هوا..ولا ونَس..ولا حِسّ

فيها كل حاجة وِحشة..كلها وَحشة

و مفيش ولا وضع من التلاتة مريح

ولا وضع..كلهم سواء

!

نرجع للحقايق؟ وللا رغيت كتير؟

مش مهم

ليا مزاج أعترف بحاجات

عارفة إنه مش وقت مناسب إني أجيب سيرتها

بس مش احنا اتفقنا إني برتكب حماقات؟

.
.

خليني أبدأ

انت ماكنتش مجرد حد ملا فراغ كان موجود في حياتي

انت خليتني لمست حاجات في الدنيا

ماكنتش أعرف بوجودها أصلا

خليتني أحسّ بحاجات جميلة

كنت بسمع عنها..بسمع وبس

خليت جناحاتي رفرفت بشكل

ماجربتوش قبل كده

وصّلتني لارتفاع في السما

ماكانش عندي ذرة أمل أوصل له في يوم من الأيام

و عشان كل ده ماحصلّيش قبل كده

كان لازم أكتشف إني في حلم

حلم صحيت منه على شرخ في روحي

عُمري ماتخيلت إنه يكون بالعُمق ده

ولا إنه يسيب جوايا....و بَرّايا الأثر ده




Friday, March 16, 2012

دنيــــا



تحتاج لها..تهرب منك

تديها ضهرك..تجري وراك

تترجّاها..تتمنـّـع

تزهدها..تترمي تحت رجليك











Friday, February 17, 2012

عن الشفاء القاتل


و قبل أيام

عندما غطستُ في حمام السباحة في النادي

قررتُ ألا أطفو من جديد

قال عقلي: هذه هي النهاية المنطقية

لواحدة مثلي

شُفِيَتْ من كل شيء

حتى من الرغبة في الحياة

تمنيتُ أن ينتهي كل شيء

في تلك العتمة الرجراجة

في قاع الحمام

لكن عندما نفذ الهواء من صدري

خانني جسمي


...................

قررتُ ألا أرى سالم

وها أنا هنا أنتظره

لماذا؟

حكايته انتهت

و كل الحكايات انتهت

.
.

على لسان "لُبنى" في رواية نقطة النور

لـ بهـاء طاهر





Monday, February 6, 2012

بتصبّي مُر العُمر ليه؟


فيه حاجات بتحصل

بتبقى فوق مستوى إدراكي

أو حتى استيعابي

زي مأساة بورسعيد

و رغم محاولاتي المستميتة للنسيان/للإلهاء

الغُصّة مابتفارقنيش

لا ليل ولا نهار

أهرب بالنوم

و أتحجج بدور البرد

عشان أفضل "أبلبع" في الكومتركس

و أنام بالـ 12 ساعة

مفيش فايدة


بعمل كل حاجة ممكن تخليني مرتاحة/مبسوطة

و مع ذلك لا برتاح..ولا بتبسط ..ولا حتى بتلهي عنها

أحضر فرح

أشوف ناس فرحانة بجد فرحة عمرها

أتمشى في شوارع وسط البلد

أقرأ كتاب لبهاء طاهر

أشتري لبس جديد

آكل شوكولاتة/كاچو

مفيش..مفيش

مش عارفة أبطّل تفكير

في الـ 76 وردة اللي اتقطفوا

من وسط شجرهم في ليلة واحدة

في الـ 76 شجرة اللي اتخلعوا من جذورهم

لما شافوا وردهم بيقع ع الأرض ويتداس عليه

و مابقاش لهم رغبة تاني في الحياة

في الـ 76 أم اللي قلبهم انفطر

في الـ 76 أب اللي قامتهم انكسرت

.
.

بفكّر في أكتر من 100 حلّوف

بيقولوا: عُمرهم كده..و هانعمل لهم ايه

والموضوع عادي و بيحصل في أي مكان في العالم

وشوية شوية هايقولوا: همّ ايه ودّاهم الماتش أصلا؟

دول أقل وصف يتوصفوا بيه إنهم حلاليف

واللي بيجري في عروقهم ده بالكتير

ميّة مجاري..أو بول بهايم

.
.
.

و أخيرا

الناس اللي تبقى شايفة الظلم البيّن بأم عينها

وماتحاولش تحاربه أو تواجهه

أو حتى ع الأقل تنكره بلسانها

ماتستاهلش تعيش في عدل

.
.
.

العنوان لـ هشام الجَخ