Saturday, November 15, 2008

.. لـو بطـلت أحــلم



مش عارفة ليه !!


الواحد مننا لما بيعوز حاجة .. و يتمناها أوي

بيشوفها _في أحلامه_ قريبة جدًا .. و على بُعد خطوات

لكن أول ما يخطّي بقدمه على أرض الواقع

يلاقيها أبعد ما تكون عن حدود الإمكانية

............................

لكني _رغم كل شئ_ هافضل موقنة

* إن مفيش حاجة بعيدة على ربنا *

* وإني مش هابطل أحلم .. و أتمنى ! *

و كمان أطلب من ربنا

يحقق لي _اللي فيه الخير بس_
من أمنياتي

:)

.............................................

على الهامش :

مش عارفة ليه _بردو_ حاسة

إني في يوم من الأيام هاستعين بـ "لينــك" البوست ده


و أقــــول "الحمـــد لله"

اللي اتمنيته و افتكرته بعيد أوي .. و ضرب من الجنون

ربنــا حققه ليا .. عشان يأكّد لي إنه بيحبني

مش عارفة بأه ده تفاؤل زيادة .. وللا حــدس؟

و أتمــنى يكــون .....

أتمـــــنى



Sunday, November 9, 2008

حـنيــــن



إحســاس غريب مسيطر عليا من فترة

نفســي أروح رحـلـــة


مش خروجة ... لأ ...

رحـلـــــــة ... و في أتوبيس ...

أبقى عارفة ميعادها و مكانها قبلها بأسبوع ع الأقل

و أفضل أحضّر نفسي و أجهّز لبسي .. و الكاميرا و الأفلام


أخطط مع أصحابي هانعمل ايه وهانتقابل ازاي و امتى وفين؟


نتجمع الصبح .. ناس تيجي بدري .. و ناس تتأخر


يتحرك الاتوبيس .. نفضل ساكتين شوية كده


و بعدين نبدأ نتكلم .. و نهرج .. و نضحك .. صوتنا يعلى

ناس تبقى لسه مش فايقة .. نغلّس عليها

جو البهجة ينتشر في الأتوبيس كله

نوصل المكان المحدد .. و نبدأ ننتشر .. و ننطلق

و نقضي اليوم كله انطلاق و فرفشة و رغي و ضحك و تصوير ووووو...

و ننسى الدنيا و ما فيها

و يخلص اليوم .. و نرجع مهدودين .. بس فرحانين

و نقول الله .. كان يوم جميل .. من عمرنا

مرّ بسرعة .. بس اتبسطنا .. و بجد فرق معانا

....................................

مش بس عشان محتاجة أغير جـو

مفتقدة أوي إحساس الانتمـــاء لمكان مــا


وحشني إحساس وجودي في مكان _أيا كان_ وسط أصحابي


ناس بحبهم .. ناس في سني .. حتى لو ماكنتش أعرفهم كلهم


المهم أكون وسطهم ..


ياااااااااه .. ياااااه

مفتقدة أووووووووي الإحساس ده

..................................

يارب .. أنا مش طمّاعة و ماقولتش نفسي أروح معسكر

كل اللي بتمنــاه دلوقتي

رحــلــــــــــــــــة .. و لـو ليــــــوم واحد بــس



Friday, October 31, 2008

العلـمـو نــورون


في الوقت نفسه اللي المتسولين بقوا يقولوا للسياح

One dollar, please!

بقينا نشوف العجب في اللغة العربية

سواء من المتعلمين أو الأميين أو حتى الجهلة

و أنا _هنا_ مش بحكي عشان أعتب على حد

أنا بس بكتب عشان لو ما اتكلمتش هـاطـقّ

و ربنا يشهد على إن الأمثلة اللي هاقولها دي شوفتها بأم عيني

...............................

يوميا و أنا في طريقي للشغل بمـرّ على مدرسة ابتدائي

مكتوب على سورها :

"إقراء باسم ربـك الذي خلق"

.............
و لا تعليق..............

مرة _في الشغل_ واحد بعتلنا فاكس بصورة جواز سفره

و المفروض إنه مكتوب فيه الأسماء زي ما هو عايزها في شهادة الميلاد

كاتب فيه بخط ايده :
اسم الأوم : فلانة الفلانية

.................................................

و كله كوم بأه و الحاجات اللي بشوفها على النت كوم تاني

تلاقي مثلا واحد بيحلف يروح قايل : واللهي

تلاقي واحد بيقدم المشيئة فيقول : انشاء الله

طب ايه؟ حتى لفظ الجلالة مش معروف بيتكتب ازاي؟

معقول مش معروف إن شاء الله معناها ايه و انشاء الله دي معناها ايه؟

...............!!!!!!!!!!!!!!!!!!..................

و بعيداً عن اللغة العربية و المهازل اللي شوفتها من الطلبة أيام الكلية

و اللي بقابلها كل يوم في الحياة العادية

و بشوفها في اليفط والإعلانات في الشوارع


و بمناسبة إن "العلمو نورون" .. و تحية لتيتة زوزي

كنا بنتناقش امبارح _في الشغل بردو_ في موضوع فتوى ضرب الزوجة لزوجها

و كان حد بيحكي عن مراته و إنها مش مطيعة و كده

و هي _متجوزة على فكرة ومعاها طفلين .. وعندها 19 سنة (!!)_

بالصدفة كانت حاضرة المناقشة دي

لقيتها بتقوللي أنا سمعت إن الراجل لو قال لمراته ماتصليش

ربنا مايزعلش منه ولا يحاسبه .. وهي المفروض تطيعه (!!)

رغم إنها كتير أوي بتذهلني بجهلها وعدم وعيها بحاجات كتير

إلا إني المرة دي ازبهليت بجد

أد كده فيه جهل في بلدنا .. وناس عايشة تحت الصفر؟

أنا عارفة كويس أوي إن العيب مش عليهم ..

العيب على اللي سابهم بقوا كده

ربنا يجازي اللي كان السبب

يمهــل .. ولا يهمــل



Monday, October 27, 2008

!! نظرية بردو


لو نُـلنـا كل اللي بنتمناه في الدنيا

و عِـشنــا سعداء و مرتاحين و متهنيين

هانسيب ايه للجـَنـّـــة؟

هايبقى ايه الفرق بأه بين الدنيا و الجنة؟

متهيألي ساعتها مش هانكون مشتاقين للجنة زي دلوقتي

ولا كنا هانعمل حساب لجنّة و لا آخرة ولا أي حاجة حلوة ربنا شايلهالنا

صدق حبيبي المصطفى :

" الدنيــا سجــن المـؤمــن .. و جنـــة الكـافــر"

سبحان الله .. حاسة أوي بمعنى الحديث ده دلوقتي

و على فكرة

مش هايصبـّـرنـا على دنيتنا دي و مُـرّهـا

غير الرضـا بقضـاء ربنا و قدرنا.. أيـّا كـــان

.............................

ربـي .. أنا بحبك أوي

و مهما حاولت أوصف كمية الامتنان اللي جوايا ليك مش هاعرف

لـك الحمــد كَـونــك ربــي