ماتشدّنيش من شَعري يا عصفور

ما تفتكرش إني بتعب لما بتسافر..

أنا بس بنساك..وأعافر..

وأعافر في الدنيا من غير أخ (!!!)

ما تفتكرش إني شاعر..

انت مش فاهم!!!

أصل الغُنا زهرة..

في كل المواسم..

يا خسارة..

ما بتطلعش..!!

ما تفتكرش إني نعش..

أو كُبّايات فاضية..

أنا كُبَّايات عصير قصَب ملْيانة ع الآخِر..

والخـلْق ما بتشربش..!

ما تفتكرش إني تاجر نُور..

و رُلْمان بلي..

مُصفّحات من عيون الناس بتتفجَّر..

و انت العيون والبضاعة..

وزِيطة المتْجر..

والأرض بنشارة خشب مفروشة..

تتدارى دمي الشّجي ما يبانش..

و إن كنت فاكر يا ننِّي عيني إني بتعب لمَّا بتسافر..

كل الحمام هاجر..

كل النسايم خناجر..

كل العيون طالعة في الصورة ولا بتلمعْش..

فكَّرتنى بالذي من مَطْرحه إتّاخر..عشان يقعَّدني..!

أكتب شعْر وأذاكر..

فكَّرتني بالمباخِر..

بالجمْر تحت بحُور من عشق شمس بنُـوت بتتبخّر..

أنا مش بحبك..بس بتبخَّر..

و أقدر أَعيش أقدر..

لمَّا تاخُدني المراكب..و إنت مش راكب..!

و أخبّي تحت المراتب قلبي حُقّ بخور..

ماتشدّنيش من شَعري يا عصفور..

أنا مش هاطير..!

و الحبيب من كل نُور غايب..

الأرض زُهرِية فاضية واللبن رايب..

واللّيل معبّي في زكايب في انتظار النُور..!

.
.
.

من روائع

بهـاء چاهـين