... كل الطرق تؤدي إلى

كلمات بتتقال بمنتهى البساطة و البراءة و اللهفة

بنقولها كتير .. كتير أوي

من غير ما نفكر ايه ممكن يكون وقعها على اللي بنوجهها له

أكيد نيتنا خير .. و هو عارف كده .. أكيد

لكن ...

أيوه .. لازم ناخد بالنا من "لكن" دي .. مهمة أوي !

....................................................

- "خسيتي أوي"

- "ايه يا بنتي انتي ايه اللي جرالك؟"

- "ايه كل اللي بيحصلك ده؟"

- "انتي عاملة ايه؟ بتشتغلي؟"

(آآآآه بشتغل)

- "باين عليكي .. شكلك تعبان أوي"

- "لازم تاخدي بالك من صحتك أكتر من كده"

- "حرام عليكي اللي بتعمليه في نفسك ده .. ربنا هايحاسبك!"

- "مش ناوية تاخدي بالك من نفسك شوية؟"

- "انتي يا بنتي وبعدين معاكي؟ آخرتها ايه؟!"

(بتبصيلي كده ليه؟)

- "مستغربة شكلك .. وشك بقى شكله غريب"

- "إن لبدنك عليك حق"

--------------------------------------------

كل المشاكل اللي فوق دي ليها حل واحد

و بتوديني لطريق واحد

" هـاوئــِـد نفسي قــريــــــــــب "

-----------------------------------

محدش يستغرب !

عايزة كل واحد يتخيل إنه كل ما يمشي في حتة

يسمع الكلام ده

و كل ما حد يشوفه _قريب أو غريب_ يعلق على شكله و صحته و أسلوب حياته ووو.....

ســؤال واحد :

إحساسك هايبقى ايه؟!!

نصيحة لوجه الله تعالى :

"ارحموا مَن في الأرض .. يرحمكم مَن في السمــاء"

أما تشوفوا حد شكله تعبان .. أو تايه مش مركّـز .. أو دبلان

مش لازم تحاوطوه بالأسئلة و تحاصروه بالنصايح من كل صوب و حدب

حتى لو كان عزيز عليكم .. و بتحبوه و خايفين عليه

خِـفـّـــوا عليــه شــويــة

هو أكيد حاسس بنفسه .. و زعلان على نفسه

و مش ناقص حد يحزّنه عليها زيادة

معلش .. استحملوه شوية

مش بإيده يكون كده

أصله بقى ضعيف

.. ضعيف أوي