بالرغم منّا .. قد نضيع

مفتقداكِ جداً جداً .. فوق ما تتخيلي

وجودِك في حياتي كان بيفرق في حاجات كتير

مفتقدة حاجات حلوة كتير كانت ما بيننا

يؤسفني أقولك إن عمرها ماهاترجع ..

عمرها

عارفة ورق الشجر الأصفر الدبلان؟

حاسة إن صداقتنا بقت شبهه

ممكن نروي الشجرة .. ممكن يرجع ورقها يخضرّ

لكن زي ما اتسابت تصفرّ مرة و اتنين

أكيد هتتساب تاني بعدين

..................

عايزاكي تفهمي حاجة مهمة :

إن يوم "واحد" بيفرق في شخصية الانسان

مش عايزاكي تفتكري إن أنا لسه زي مانا

مش أنا اللي سبتيني من سنتين

اتغيرت .. اتغيرت كتير

انتي كمان اتغيرتي .. كتير

عايزاكي تفهمي حاجة أهمّ :

اوعي تفتكري إني مش عايزة نرجع زي زمان

أبداً

الفكرة إننا مابقاش ينفع نرجع

انتي و أنا عارفين الأسباب

أهمها _بالنسبة لي_ :

لا أنا هي أنا

ولا انتي هي انتي

أكيد هانفضل أصدقاء

لكننا أبداً أبداً ..... كما كنا

لن نعود