Friday, June 1, 2012

شي ما بينتسى


فاتت سنة

و مش عارفة أخرج من مدارك

.
.

ملعونة الجاذبية

و ملعونة كل قوانين الطبيعة


................................................

العنوان من صباح و مسا

لـ فيروز





Sunday, May 27, 2012

مصـر تنتـحـب 2


نفس حالة الاكتئاب

اللي بتجيلي بعد كل مذبحة

بس المرة دي

المذبحة مش لواحد ولا عشرة ولا عشرين

المذبحة للثورة نفسها

مطلوب مني أختار بين اتنين

واحد قتــــل

و التاني بـاع دم اللي اتقتـــل

.
.

أنا مش هاشارك تاني في المهزلة دي

ياكش تولع

و يولع معاها كل العبيد






Thursday, May 24, 2012

جتك القرف


توضيح لا بد منه: البوست ده

موجّه للبهائم والحلاليف.."فقط" لا غير

و همّ عارفين نفسهم كويس

عشان مفيش أكتر منهم دلوقتي

طلبت معايا شتيمة بأه

عشان دمي محروق

ربنا يحرق دمك منك له

جتك القرف

.
.

شايف اللي في الصورة ده؟

عارف ده ايه؟

دم..هه؟ دم

عارفُه؟

عندك منه؟

ماعتقدش

عارف ده دم مين؟

دم اللي ماتوا عشان تعيش يوم زي ده

فاكرهم؟

ماظنّش

!

انت ماتجيش تقول لي انتخبت شفيق

و تطلّع لي تنهيدة من أعماق أعماقك

و في الآخر تقول لي: ربنا يولّي من يصلح

مَن يصلح ده ربنا مش هاينزّله بباراشوت من السما

أمّال جنابك مكلّف نفسك وقايم من ع السرير

و نازل من بيتك و ضارب مشوار لحد اللجنة

و واقف على رجلك ساعتين في الطابور

عشان ايه؟

و ربنا إدّالك عقل تعمل بيه ايه؟

و لما تروح تنتخب واحد ماراحش مكان إلا واتضرب بالجـِزَم

يبقى اللي جوه جمجمتك ده اسمه ايه؟

لما تنتخب واحد إيديه ملطّخة بدم اخواتك

_دا لو اعتبرنا إنك بني آدم زينا يعني مش حلوف ولا حاجة_

تبقى فرقت ايه عن البهايم اللي ماعندهمش عقل يميّز؟

طب ع الأقل دول عندهم فِطرة لسه محافظين عليها

إنما انت..ايــــه؟

هاسيبك تشوف الشتيمة الأنسب

و تقف أدّام المراية..وتعيش بأه..! ـ

.
.
.

قسَمًا برب الكعبة

أنا مش خايفة على حياتي ولا دمي في البلد دي

أدّ مانا خايفة على إنسانيتي

"فَإِنَّهَا لا تَعْمَى الأَبْصَارُ وَلَكِن تَعْمَى الْقُلُوبُ الَّتِي فِي الصُّدُورِ"








Monday, April 30, 2012

مش أعمى لكن..بفتش في النهار ع الضيّ


عندي بابا

و عندي ماما

و عندي أخوات من بابا و ماما

و عندي أخوات لم تلدهم أمي

و عندي أصحاب

و عندي ناس بحبهم

و عندي ناس بتحبني

و عندي ناس بتدعيلي

و عندي إيدين..كتير بعمل بيهم حاجات مفيدة

و أهم وظيفة ليهم..يحضنوني كويس آخر الليل

و عندي رجلين..ممتنّة جدا ليهم

لأنهم لسه قادرين يشيلوني رغم كل اللي حصل/بيحصل

و عندي عينين..بشوف بيهم حاجات محدش شايفها غيري

بشوف بيهم نظرات حلوة في عيون ناس..ـ

ـ_بغض النظر عن أي شيء_..ناس بتـ...بتـ...بتحبني!ـ

ناس شايفين فيا اللي محدش_غيرهم_ شايفه

ناس شايفيني "كبايات عصير قصب مليانة ع الآخر" ونِفسهم يشربوا

في عز ما أنا شايفة نَفسي "نَعش..كبايات فاضية"..! ـ

و عندي عقل..يخليني أفكر ألف مرة قبل ما آخد خطوة غلط

و عندي إحساس..يخليني أقدّر كويس جدا المشاعر الإنسانية

أيًّا كان نوعها..و مصدرها..و وقتها

و عندي ضمير..يخليني حذِرة جدا في كل فتفوتة في حياتي

و عندي شغل..بفرّغ فيه طاقتي وجزء كبير من قرفي و وقتي

و عندي حاجات كتير..مش عند ناس كتير

و فوق ده كله

عندي إيمان و ثقة و يقين في ربي

و إنه لن يضيّعني

.
.

لازم أعمل كده

محتاجة أحس بكمّ النعم اللي عايشة فيها

عشان لو ماعملتش كده

مش هاعرف أكمل

مش هاقدر

....................................

العنوان لـ: نجيب سرور