Monday, February 6, 2012

بتصبّي مُر العُمر ليه؟


فيه حاجات بتحصل

بتبقى فوق مستوى إدراكي

أو حتى استيعابي

زي مأساة بورسعيد

و رغم محاولاتي المستميتة للنسيان/للإلهاء

الغُصّة مابتفارقنيش

لا ليل ولا نهار

أهرب بالنوم

و أتحجج بدور البرد

عشان أفضل "أبلبع" في الكومتركس

و أنام بالـ 12 ساعة

مفيش فايدة


بعمل كل حاجة ممكن تخليني مرتاحة/مبسوطة

و مع ذلك لا برتاح..ولا بتبسط ..ولا حتى بتلهي عنها

أحضر فرح

أشوف ناس فرحانة بجد فرحة عمرها

أتمشى في شوارع وسط البلد

أقرأ كتاب لبهاء طاهر

أشتري لبس جديد

آكل شوكولاتة/كاچو

مفيش..مفيش

مش عارفة أبطّل تفكير

في الـ 76 وردة اللي اتقطفوا

من وسط شجرهم في ليلة واحدة

في الـ 76 شجرة اللي اتخلعوا من جذورهم

لما شافوا وردهم بيقع ع الأرض ويتداس عليه

و مابقاش لهم رغبة تاني في الحياة

في الـ 76 أم اللي قلبهم انفطر

في الـ 76 أب اللي قامتهم انكسرت

.
.

بفكّر في أكتر من 100 حلّوف

بيقولوا: عُمرهم كده..و هانعمل لهم ايه

والموضوع عادي و بيحصل في أي مكان في العالم

وشوية شوية هايقولوا: همّ ايه ودّاهم الماتش أصلا؟

دول أقل وصف يتوصفوا بيه إنهم حلاليف

واللي بيجري في عروقهم ده بالكتير

ميّة مجاري..أو بول بهايم

.
.
.

و أخيرا

الناس اللي تبقى شايفة الظلم البيّن بأم عينها

وماتحاولش تحاربه أو تواجهه

أو حتى ع الأقل تنكره بلسانها

ماتستاهلش تعيش في عدل

.
.
.

العنوان لـ هشام الجَخ



Monday, January 23, 2012

من ضمن كلام كتير 2


كل يومين تصحى من النوم أعصابها تعبانة

لدرجة إنه بيبقى هاين عليها

تخبط راسها في الحيطة اللي جنبها مباشرةً


و أول ما تفتح عينيها..تقعد ع السرير

تفضل تهزّ في دماغها..و تسأل نفسها: ـ


مش همّ خلاص مشيوا؟

مش همّ خلاص اختفوا من حياتنا؟

طب ايه؟

ليه مايفارقوش أحلامنا

بنفس البساطة اللي فارقوا بيها أيامنا؟






Monday, January 16, 2012

النـدّاهـة


اتندهت

فـ انتبهت

فـ اتشدّيت

فـ لبّـيــت

فـ اتخطفت

فـ اتقطفت

فـ هـَويـت

فـ انتهيت






Thursday, January 5, 2012

حقيقة 3


أصـلا

أصـلا

أصـلا

حبي ليك

و تعلقي بيك

و إيماني بيك

و ثقتي فيك

و خوفي على زعلك

أكتر من خوفي منك

من أعظم النِعَم اللي وهبتهالي

و عوّضتني بيها عن كل اللي فاتني/فوتته في حياتي

.
.

شكرا يارب

شكرا بجد

شكرا قدّ السما و الأرض