Tuesday, April 19, 2011


يوم ألتقي مَرْسَى

و سنين ياخدني الطيش

.
.
.

الهَويس





Sunday, April 17, 2011

من ضمن كلام كتير 1


ـ"ماتشدّنيش من شَعري يا عصفور

أنا مش هاطـير..!
"

.
.
.

بهـاء چاهـين


....................................................

ماينفعش أبقى بقولك:

"إني مابعرفش أطير..لوحدي..

بخاف أطير..وماليش جناحات"

تيجي تقول لي:

"ماتخافيش..هاعلّمك الطيران..

هاكون جناحاتك..وهاطير معاكي"

ويدوب تطلّعني السما

وفجأة ألاقيني لوحدي فوق..

لوحدي..من غير جناحات..ومابعرفش أطير..!

يعني ايه تسيبني في السما لوحدي؟

و أنا لسه مابعرفش أطير..

وماليش جناحات؟

طب كنت سبتني لوحدي..ع الأرض

لوحدي لوحدي..بس ع الأرض..!

لكن كده حرام

حرام بجد..حرام..!
ـ




Wednesday, April 13, 2011

ناقصني حد


حاسة إني زي العيال الصغيرين

محتاجة حد يقعّدني على رجله

حد أغطس في حضنه..أغطس "مابانش"..

وأعيط براحتي..براحتي أوي

ويطبطب عليا

ويقول لي:

- معلش..الـ"واوا" هاتخفّ

معلش..هاتبقي كويسة..!

و أنا عندي استعداد أصدّقه

وأبطّل عياط

تمام زي الصغيرين

مع إن الـ"واوا" بتاعتي كبيرة أوي

مش زي بتاعت الصغيرين





Tuesday, April 12, 2011

ألف ليه..وليه؟


عندي استعداد كبير

"أحاول" أنسى

.
.
.

بس أفهم الأول

كــل ده كان ليه؟