Sunday, June 13, 2010

كــسـْــر


أنا لسه مش عارفة أتعامل

حاسة إني مكسورة أوي

مقهورة أوي..محبطة أوي

موجوعة أوي أوي أوي

بقالي يومين بنام معيطة

و طول اليوم عينيا مخنوقة بالدموع

بلبس نضارة شمس مع إني مابحبهاش

عشان محدش يشوفني مدمعة

مش مستحملة أي كلام من نوعية :

"مالك؟" - "شكلك متغير" - "فيه ايه؟"

مش مستوعبة اللي بيحصل

حاسة إني بتفرج على فيلم طويييييييل مش عايز يخلص

الأسباب كتير..أهمها طبعاً موضوع خـالـد

مش قادرة أنسى..مش عارفة أفكر في أي حاجة تانية

صورته مش عايزة تسيب خيالي..لا حي ولا ميت

نفسي بس حد يرد على أسئلتي!!

هو احنا ليه بيحصل فينا كده؟

ليه بنتعامل بالشكل ده؟

ليه دمنا بقى بالرخص ده؟

و اللي بيعملوا فينا كده دول!!!!

ماهيتهم ايه؟ بني آدمين زينا من لحم و دم؟ أشك!!

طب بلاش دي..جنسيتهم ايه؟ ملّتهم ايه؟!!!!

أنا مابقتش عارفة حاجة..أي حاجة

أسئلة كتيييير أوي مش لاقية لها إجابات

أفكار سوداوية كتييييير مش عارفة أهرب منها

مابقتش عارفة أعيش في الدنيا دي

و مش مستنية منها حاجة عدلة

مش عايزاها و مش عايزة منها حاجة

كل اللي يهمني دلوقتي إني أخرج منها

يارب ريحني منها

يارب





Saturday, June 12, 2010

حرام


أنا مش لاقية حاجة أقولها..

غير إن خالد ده بجد لو حقه ضاع

يبقى احنا فعلا نستاهل كل اللي بيتعمل فينا

.
.

للي ماعندوش أي فكرة عن الموضوع :

أنا اسمي خالد محمد سعيد

كلنا خالد سعيد




Friday, June 11, 2010

ممكن أعرف؟


ليه ماجتشي؟!!

كان ناقصني تبقى حاضر

ألقى إحساسك في جلدي

زي خربوش الضوافر

تشرب الضوء المزغلل

أو تمزمز في الموسيقى

أو تميّل فوق وداني تنم نمه

وأما نرقص

قلبك انت عشرة بلدي

قلبي تانجو أو مارينجي

وابدأ أضحك.. مش لوحدي

أصل رقصك شىء يفطس

حركة واحدة لا هي تانجو أو خلافه

بس إحساس مستمر بإننا نفضل نظقطط

ليه ماجتشي!!

طب فرضنا ماتبسطش

هلقى فين حضنك وأعيط؟!!!!!

مش يكون قلبك عليا؟!

وإن صحيح وقتك مزنق

أو مكانك مش بيسمح

سيبلي حضنك طب وروّح

كف إيدك يشفي جسمي لو مضحضح

ويناولني عود قرنفل

طعمه يفضل من هنا لآخر الوجود

ما الوجود مرهون بروحك جوه مني..

حتى لو مشوار بياخدك

زي بوسة أخدها خدك

إيه اللي فاضل فوق مسامك منها قوللي؟!

قبل ما تفكر جاوبني..

ليه ماجتشي؟!!

رغم إني..

شفت إيدك بتحاوطني..

وانت واقف جوه صوري!!

ــــــــــــــــــــــــــــــــــــــــــــــــــ

"حضرت ولم أجدك"

هيثم دبور

نقلاً عن المصري اليوم






سَــنَـــد


بابا حبيبي..

ماينفعش أقول إني بحبك أد الدنيا كلها..

زي ما كنا بنقول زمان..


و ده لأني مابقتش أحبها خالص..زي زمان..

عشان كده مش عايزة أشبّه حبي ليك بيها..

لكن ينفع أقول إني بحبك أكتر من أي حاجة لسه بحبها..

أو ممكن أحبها..

مش عارفة كان ممكن الدنيا يبقى شكلها ايه من غيرك..!!

مش عارفة بجد أتخيل

الحمد لله إنك موجود

ربنا يطوّل وجودنا مع بعض لآخر الدنيا

ويجمعنا سوا في الجنة

اللهم آمين