Sunday, May 29, 2011

كفاية


ماينفعش كل ما تكلم حد تفضل تقول:

"أنا بعزّك..أنا بحبك..أنا ماليش غيرك..

انت أقرب حد ليا"

و في نفس الوقت كل تصرفاتك تبقى عكس كلامك

مش منطقي خالص يعني..!

إما إنك تقول..وتتعامل ع الأساس ده

وأفعالك تدلّّ على أقوالك

أو إنك ماتتكلمش أكرم لك..!

.
.

كفاية بأه..كفاية

اللي فيا مكفّيني بجد

ومش طالباكي خالص يعني





Tuesday, May 24, 2011

انت ايـــه؟


نفسي أعرف بجد

انت ايــه؟

.
.

ذنب عملته في دنيتي..

و ربنا بيعاقبني _عنه_ بيك؟

.
.

و للا انت واحد من ضمن ابتلاءات كتير في حياتي..

و ربنا بيختبرني بيك؟

.
.

وللا انت شئ مش لاقية له توصيف مناسب..

ربنا بيعذبني بيك دلوقتي..هنا

عشان يخفف عني بعدين..هناك؟

.
.

وللا انت قــدَر انكتب عليّ..

و مش هاعرف أهرب منه؟

.
.

وللا انت لعنة هاتفضل تطاردني طول حياتي..

و مش هاقدر أخلص منها؟

.
.
.

حاسة إني لو مافهمتش

هايجرالي حاجة فعلا




Saturday, May 21, 2011

مـدد يا كريم..مـدد


عن أنس بن مالك ،

قال رسول الله صلى الله عليه وسلم:

"إذا أحب الله قوما ابتلاهم ،

فمن رضيَ فله الرضا ،

ومن سخط فله السخط
"

.
.

كما ورد في الأثر:

"
ما نزل بلاء إلا بذنب..ولا رُفِـع إلا بتوبة"

.
.

للأسف..و للأسف الشديد

مش قادرة أفرق _حاليًا_ بين:

البـلاء..و الابتـلاء


.
.
.

يارب..نوّر لي بصيرتي

و ارزقني الرضــا




Tuesday, May 17, 2011

شوف ازااااااي؟


النهارده يوم مش عادي

دا يوم ظريف وخفيف ولطيف..

لطافة السنيييين والناس والدنيا كلهاااااا..!

قال ايه "عيد ميلادي"!!!!

.
.
.

من يوم ما وعيت ع الدنيا

و أنا كل سنة يوم ميلادي ييجي في أيام الامتحانات

حتى بعد ما خلصت دراسة..

الامتحانات ماخلصتش..!

بالعكس كمان..

امتحانات الدراسة كانت أسهل مليون مرة

من كل اللي جه بعدها

بس أنا أشهد وأبصم بالعشرة..

لأ بالعشرين..إن امتحان السنة دي

لا شوفت ولا هاشوف زيه..

الحمد لله

.
.
.

أمنية السنة دي:

بتمنى من كل قلبي

إن الدنيا تسيبني في حالي

مش عايزة منها حاجة..أي حاجة..

بس هي كمان لا تعوز ولا تدّيني ولا تاخد مني حاجة

.
.
.

دعوة السنة دي:

يارب لصّمني..و داويني..و طبطب عليا

يارب




Saturday, May 14, 2011

مش كده؟


ـ"أنا بس بنساك وأعافر..

و أعافر في الدنيا من غير أخ"

.
.
.

بهـاء چاهـين

............................................

هو أنا هانساك..

و هاعرف أكمّل حياتي عادي..

وهابقى كويسة كمان..

مش كده؟

و أما أشوفك مرة صدفة

هابقى طبيعية..

و مش هاتأثّر خالص..

ولا هاتعب..

ولا هاضعف..

ولا هاترعش..

ولا هادمّع..

ولا أي حاجة من دي..

مش كده؟

.
.

ينفع تضحك عليا وتقول لي:

"آه..هو كده فعلا"

ينفع؟





Wednesday, May 11, 2011

New Message!


أنا متعودة دايما أقول

"اللهم أجرني من النار"

7 مرات بعد الفجر والمغرب

النهارده بعد ما صليت المغرب

دفنت وشي في كفوفي _كالعادة_ وبدأت أرددها

"اللهم أجرني من النار"

مرة..واتنين..وخمسة..وسبعة..

لأ مش كفاية..!

هو فيه أكتر من كده نار؟؟!!!

(عينيا بدأت تدمّع)

.
.

"اللهم أجرني من النار"

عشرة..خمستاشر..عشرين..

لأ مش كفاية..!

"النار"؟

المعنى الحرفي..وللا المجازي؟

(بدأت الدموع تنقّط مني)

.
.


"اللهم أجرني من النار"

تلاتين..أربعين..خمسين..

قولتها يمكن أكتر من ستين مرة..ماعدّتش

و فجأة..حسيت بيه
بيقرب

وقف جنبي..حط إيده على وشي "المتغطّي"

نزلت إيدي..وخدته في حضني

حط خدّه على خدّي (لوحده كده!)

مسكت إيده ومسحت بيها دموعي

وحضنته جاااااامد أوي..

كنت عايزة أقول له: احضنّي أوي..

محتاجة أتحضن جامد..

محتاجة حضن يكفّي دموعي..

لكن أقول لمين؟ وأقول ليه؟

.
.

الرسالة وصلت يارب

زي الرسالة القديمة..ما وصلت ساعتها

.
.
.

بس أنا لسه تعبانة يارب

تعبانة بجد





Monday, May 9, 2011

مُـفــارقـة


ها قد انهـار الجـِـدار..

و لم ينتـهِ _بعد_ من خيفة الانهـيار..!
ـ





Sunday, May 8, 2011

تســنيم


يمكن دي أول مرة أكتب عنها

بس مش أول مرة أفكر أكتب عنها

يمكن تكون ماتعرفش معزّتها عندي أد ايه

ولا عارفة إن ليها رُكن مهم في قلبي

بس هي _أكيد_ عارفة إني بحبها

و بتيجي كتير على بالي..وأحيانا كمان بحلم بيها

يمكن عشان أنا مش من هواة إني أفضل أقول للي بحبهم :

أنا بحبكم..بعزّكم..ليكم مكان في قلبي....إلخ..!

يمكن عشان أنا بحب الحُب النقي..

اللي بيبان بظروفها..من غير قصد..

.
.

أنا عارفة كويس إنها حاسة بيا..!

عارفة حالتي _حتى لو مش بالظبط_!

مُشفقة عليا..يمكن..!

صعبانة عليها..جايز..!

بتدعي لي..مش بعيد..!

.
.

من يومين بعتت لي كلمتين/تصبيرة/طبطبة:

"أكيد في آخر السكة ضي..

أكيد في آخر السكة نور"

.
.


طب أنا عندي سؤال

عارفة إن إجابته مش عندها

ولا عند غيرها

بس أكيد موجودة عند

الرحمن..الرحيم..الكريم..العظيم..القادر..الحنيّن..

ليه الضي يبقى في آخر السكة؟

ليه مش في أوّلها؟

ليه حتى مش في نُصها؟

أعمل أنا ايه بيه في آخرها؟

أمشيها ازاي بطولها ده؟

أمشيها ازاي وكلها عَتمة..و وَحشة..و "قساوة"؟

"قساوة" يا تسنيم..فاكراها؟!!!!!

أمشيها ازاي وأنا كلي تعب..و وجع..و خوف؟

ازاي؟



Wednesday, May 4, 2011

أول مرة




أول مرة أنبه/أنوّه/أنصح بعدم قراءة بوست

بجد بلاش حد يقرأ البوست ده

ألا هل بلغت؟ اللهم فاشهد..!

.
.

أول مرة أعيط العياط ده كله في الصلاة

أول مرة دموعي تقفل عينيا

ومابقاش حتى شايفة لون المصلّية أدّامي

أول مرة لساني يعجز

و مايلاقيش حاجة يقولها في السجود غير "يارب"

أول مرة أقول "يارب" ومابقاش عارفة/قادرة أكملها

وأشهق في نصها من شدة العياط

.
.

أول مرة صوت عياطي يبقى عااااالي أوي

لدرجة إني أبقى خايفة يصحّي بابا أو ماما

في الأوضة التانية

.
.

أول مرة أعمل بوست من غير ما أحط صورة..!

.
.

أول مرة أقول هنا لأي حد بيقرالي

أنا آسفة على كمية الحزن والإحباط والاكتئاب

اللي مسيطرة على المدونة

بس ده مش بإيدي..والله ما بإيدي

ساعات بحس إني لو ماكتبتش هاطقّ

بكتب..وبردو بطقّ..!

.
.

أول مرة هاطلب من اللي بيقرالي يدعي لي

يدعي لي بالرحمة

و بمناسبة الرحمة بأه ؛

أول مرة أكتب "وصيتي" كانت من يومين

أيوه الوصية اللي انتو عارفينها

اللي بتيجي بعديها الراحة الأبدية دي..!

.
.

أول مرة في كل حاجة دي

بتبقى صعبة أوي بجد..أوي..!
ـ





يا الله


يارب

ارزقني عُمْرة

.
.

يارب

محتاجة عَمْرة