غــربــة

لوحدى..

وامشى وحدى ع الجسور

طيرة..هاجة م الطيور

طيرة..هربانة بجناحها

هاجة م الطير فى الطابور.

***
أترمى..وارقص ..وأبكى

واترعش..وانزف..وأدور

واتملى بهوا البحور.

***
يا سلااام لو يتوه منى مكانى

كل ما أخرج منه للتانى

يتوه الأولانى..!!

***
نص نايم..نص صاحى

أمشى فى اطراف الضواحى

من ورا نخل الكفور.

***
لا صباع شافنى وشاور

ولا ناس..بيا..تشور

وحدى .. ما يخبر عليا

غير غبار الخطوة

غير صوت العبور

زى مافى ريح الدروب..

ريحة الكافور

هربانة من شجر الكافور..!!

***
يا سلاااااااااااااام

لو يتوه منى مكانى

كل ما اخرج من مكان

مارجعش تانى..

.................................................

* الخـــال