Sunday, January 27, 2008

!! حاجة تجنن



واحدة مخلصة دراسة و مذاكرة و امتحانات

بقالها أكتر من سنة و نص

تحلم بالامتحانات

ليييييييييييييييييييييييييييه؟!!!!

لأ و مش أي امتحانات

مرة تروح متأخرة عن الامتحان ساعتين

مرة تفتكر فجأة إن عندها امتحان و هي في البيت

مرة تلاقي نفسها جوه اللجنة و هي مش مذاكرة أي حاجة

مرة تكتشف ليلة الامتحان إنها مافتحتش المادة قبل كده

مرة تتفاجئ إن عندها امتحان مادة تانية غير المادة اللي ذاكرتها


مالي أنا و مال الامتحانات؟؟

بتطاردني حتى في أحلامي؟؟

دانا ماصدقت خلصت مذاكرة و امتحانات

و احنا حتى في أجازة نص السنة

... أنا بجد مفرررررووووسة


Wednesday, January 16, 2008

الشتـا .. و دفـاه


دخل الشتا وقفل البيبان على البيوت ..

وجعل شعاع الشمس خيط عنكبوت ..

حاجات كتير بتموت في ليل الشتا ..

لكن حاجات أكتر بترفض تموت ..

عجبي !!

--------------------------

حاجات أكتر بترفض تموت

حاجات أكتر بترفض تموت

حاجات أكتر بترفض تموت

......................

جسمي بردان ... لكن روحي دفيانة


Monday, January 7, 2008

أيــوه .. كنت


باكره ضعفي .. و قرب دموعي

خصوصاً لو مش عاوزاها تنزل أدام حد معين

.. و مقدرش أمنعها



كنت فاكرة إني بقيت أقوى من كده

.. كنت


Monday, December 31, 2007

بحلم ببكرة



زي النهارده السنة اللي فاتت اتسألت عن أمنياتي لـ 2007 _على المستوى الشخصي_ و كان ده ردي :

1- نفسى ربنا يرفعني لدرجة الإيمان اللى بتمناها... نفسى اوووى أكون من المؤمنين اللى اتذكروا فى القرآن.

2- نفسى أشتغل أوووى ... بس مش أى شغل و السلام ... نفسى فى الوظيفة اللى بتمناها.

3- نفسى شخصيتى تكون أحسن و أحسن ... و أتخلص من بقية عيوبى.

..*Principe Azzurro ة4- نفسي أقابل الـ

والحياة تبقى وردي .. وردي أوي

من كل أمنية من اللي فاتوا حققت جزء ... فيما عدا الأمنية الأخيرة ... ماينفعش تتجزأ

يا تتحقق على بعضها ... يا بلاش
!! :)


2007 :

كنتي غريبة ... من أغرب السنين اللي مرت عليا في حياتي

ضميتي حاجات حلوة كتير ... فرحتني فعلا ... فاكراها أوي

وطبعا كان فيكي حاجات مش لطيفة ... ضايقتني أكيد ... بس مش عايزة أفتكرها

كنتي سنة طويلة ... أكتر من اللازم ... بس الحمد لله خلصتي

خلصتي عشان تأكدي لي إن كل حاجة ليها بداية و ليها نهاية

.. ياللا كفاية بقى كلام في اللي فات


2008 :

فاتحالك دراعاتي على الآخر... حاطة عليكي آمال كبيرة أوي

مستنية منك تحققي لي أحلام كتييييييير مالهاش نهاية ..

كمان مستنية حاجة معينة ... بتمنى بجد ربنا يحققهالي ..

نفسي الدنيا ترجع تتملي خير من تاني ..

نفسي أرجع أحب كل حاجة و كل حد حواليا ..

متفائلة ... و ظني بربنا كله خير



كل سنة و احنـا طيبين ... و مليانين خير من جوانا