Friday, July 6, 2012

و الدمع ساقية كـبت


يا كل بنت بتنام معيّطة كل يوم

و صعبان عليها نفسها

بعد ما أقولك "معلش..فرجه قريب" ـ

هاحكيلك حكاية

عشان تحسّي بقيمة دموعك دي

و تحسّي إنها نِعمة

نِعمة _فعلا_ ماتتقدرش بتمن

....................................

هاحكيلك عن واحدة كده

واحدة كانت لما تتخض تعيّط

حد يسمّعها كلمة..تعيّط

يبصّ لها بصّة
..تعيّط

تزعل..تعيّط

تتخنق
..تعيّط

تتجرح
..تعيّط

تتخبط
..تعيّط

تتخربش
..تعيّط

تتوجع
..تعيّط

مفتاح الدموع عندها

كان كلمة: مالِك؟

لما الـ"واحدة" دي

يعدّي عليها 8/7 شهور

ماتنزلش منها دمعة واحدة

رغم إنها بتمر بنفس الحالات السابقة

ممكن جهازها العصبي يبقى حالته ايه؟

و حالتها النفسية تبقى عاملة ازاي؟





Sunday, July 1, 2012

بَـيْــنَ بَـيْــن


"وَأَنَّهُ هُوَ أَضْحَكَ وَأَبْكَى"

"وَأَنَّهُ هُوَ أَمَاتَ وَأَحْيَا"

.
.

سورة النَّجم

الآيات: 43 - 44

........................................

يارب

احييني أو موّتني

بين البينين ده

كل يوم بيقتلني





Sunday, June 24, 2012

كل الحاجات


ـ"كل الحاجات حواليا تدور

زي الحيطان بتداري النور" ـ

.
.

منيـر

......................................................

إنك "تقرر" تهلك نفسك في الشغل

و تدوّر على أي مكان تروحه بعده

و تقضي ما لا يقل عن 12 ساعة بره البيت

عشان ترجع يادوب تلبّي احتياجات جسمك

من دُش و أكل و شرب و خلافه

و بعدين تترمي ع السرير

و ماتلحقش تفكّر في أي حاجة

و تروح في النوم أول ما راسك تلمس المخدّة

لدرجة إنك ماتلحقش تكمّل أذكار النوم

تقوم كل الحاجات اللي بتهرب من التفكير فيها و انت صاحي

تطاردك في أحلامك و انت نايم

و تحس _حرفيًا_ إنك بتجري في مكانك





Monday, June 11, 2012

صفـّي قلبك


نصيحة بجد

لو في قلبك مشاعر سلبية

تجاه حد من اللي حواليك

حاول _بأي طريقة_ تتخلص منها

مش عشانه..عشانك انت

صفّي قلبك

صفّي روحك

اتنفّس