Monday, May 10, 2010

أي


قالوا زمان :

"يا نحلة لا تقرصيني..ولا عايز عسلك"

و أنا
النهارده بقول :

"يا ست النحلة،،

سايق عليكي النبي

بطّلي قرص فيا و ارحميني بأه


حرااااااااام عليكي أنا خلاص اتهريت

والله العظيم ما طلبت منك عسل..ولا أنا أساساً بحبه


ولا عايزة منك شمع..

ولا عندي استعداد أستشفى بــ [قـَرْصك
*]"

...................................................................


* ثابت علمياً وطبياً فوائد قـرْص النحل و علاجه لبعض الأمراض




Thursday, May 6, 2010

وَجـَــع


بقالي أكتر من ساعة فاتحة الصفحة و مش عارفة أكتب ايه

رغم إني هاموووووووووت وأتكلم

نفسي أحكي..أرغي..أفضّي اللي جوايا في حضن أي حد

مش هاضحك على نفسي و أقول الأحضان كتيييير...بس النِفس اللي تحكي

و لا هاكذب وأقول إني مش لاقية و لا حضن يضمّني

كل اللي أنا عارفاه إني عايزة أتكلم

واللي متأكدة منه جدا إني لو لقيت حد أكلمه

و قعدنا مع بعض..وظبّطنا القعدة..و وشنا في وش بعض

و إيد ع الخـَــد..و استعداد كويس جدا للسَمْــع..

و ها بأه..ياللا احكي..

ايه اللي مضايقك؟ ايه اللي مزعلك؟

ايه اللي خلاكي تنامي معيّطة امبارح؟وخلّى عينيكي بايظة كده طول اليوم النهارده؟

و صوتك مخنوق كده ليه؟ و موودك وِحِش؟

و مضطربة؟ ومش عارفة تتكلمي كلمتين على بعض ولا تقولي جملة مفيدة؟

و أما بتتكلمي شكلك بيبان أوي متغيّر؟

و عاملة نفسك بتضحكي عادي وانتي أساساً فاشلة في التمثيل؟!

و أسئلة كتيييييير تشجّع أي حد _مخنوق أو لأ_ على الفضفضة والحكي
.
.
.
.
.
اللي واثقة منه جدا إن الإجابة هاتكون

صمت..صمت تاااام

و دمــــوع..

و..بــــس





Wednesday, May 5, 2010


يارب


أرجوك

و أتوسل إليك

ماتحطنيش في موقف زي ده تاني

عشان أنا بجد مش حِمل وجع من أي نوع

يارب

شيل من حياتي أي حاجة وحشة

تكون جزء من ذكرى أوحش هاتفضل تلازمني طول حياتي

يااااااارب

ماتعلّقنيش بأي حاجة ماليش نصيب فيها

وثبّتني..خليني جامدة..قوية..وبستحمل

يارب

ارزقني بعد العُسر يُسر

عشان الأعسار كترت أوي

و عشان الحياة بقت أصعب من إني أتحمّلها

و أنا خلاص تعبت



Monday, April 26, 2010

تلكيكة


ورغم إن الكل داق الذل

الناس ترد تقول صباح الفل

و الشمس تشرق ع الجميع وتطل

و الشمس ليها ع القلوب تأثير

تنده علينا وصوتها مزيكة

تمسح سواد الليل بأستيكة

والناس تصدق أي تلكيكة

تملا قلوبها بالفرح وتطير


صباح الفل يا صاحب الـ«تلكيكة»،

يا «عاشق الوطن» وانت بتغني:

سابق خطاوي الزمن والوقت يسرقني

والعمر هو التمن يجري ويسبقني

عاشق تراب الوطن إمتى ها يعشقني

أنا ابنه ولا لقاني جنب باب جامع؟
.
.
.
ارفع سيفك واقتل خوفك

حارب حتى ملوك الجن

ارفض ظلمك واحضن حلمك

وامسك قلمك وابري السن

اصرخ ع الأوراق بالفن

تسمع كل الدنيا أداءك

تبقى ساعتها كسبت رهانك
.
.
.
نفس الوشوش هي الوشوش

من ميت سنة ماتغيروش

لسه الوحوش رغم الدموع

والسكنة هي الوحوش

ما تغركوش الأقنعة

حبة رتوش مش مقنعة

ماتغمضوش وما تقولوش

إن الوجوه المفزعة

صبحت خلاص ما يخوفوش

...............................................

بقلم "أسامة عبدالصبور"

نقلاً عن المصري اليوم