التالتة تابتة

عادي إنك تتخربش

في أي حتة من روحك/جسمك

(ولتكن إيدك الشمال مثلا..زي إيدي المتخرشمة كده)

فـ تتعور..وينزل منك دم

وطبيعي إن التعويرة توجعك..وتفضل واجعاك شوية

و طبيعي جدا إنها _التعويرة_ تبدأ تخفّ واحدة واحدة

.
.
.

ممكن يحصل إنك تكون ماشي في طريقك عادي

و إذ فجأةً تتخبط في نفس مكان التعويرة الأولى

اللي كانت أصلا قرّبت تخفّ..

يقوم الجرح مفتوح تاني..والدم ينزل تاني

و تحس بالوجع أكتر

لأنهم أصلا جرحين فوق بعض..في نفس المكان..!

.
.
.

لكن ايه بأه اللي مش عادي ولا ممكن ولا طبيعي؟

إنك تتلطش تالت في نفس المكان..

و الجرح فيه لسه حـي..

ساعتها بأه

بما إنك شاطر _وأصلا كبير_ تقوم باصص في المراية

و بعلو صوتك..و عزم ما فيك قايل:

لأ بأه..

و ربنا مانا متعوّر تاني

و ربنا مانا موجوع تاني

و الجرح ده بأه هايخفّ يعني هايخفّ

بمزاجه أو غصب عنه

لازم يخف

هه بس..!

ـ

حـوار

القلب: الزّن ع القلوب أمـرّ من العلْقم (1)ـ

العقل: "وَلَوْلاَ أَن ثَبَّتْنَاكَ لَقَدْ كِدتَّ تَرْكَنُ إِلَيْهِمْ شَيْئًا قَلِيلا" (2)ـ

.
.
.
.

ـ(1) من إبداعاتي..هـأ..! ـ
ـ(2) سورة الإسراء/ الآية 74

من ساعة ما رجعت

وأنا كل ما تضيق بيا

أو أحس إني هارجع لورا خطوتين تلاتة

أغمّض عيني أوي..

أغمّضها عن كل القُبح اللي حواليا..

و أعزل نفسي عن الدنيا والناس..وكل حاجة..

و أفتكر أيام هناك

بكل النور..والبراح..والراحة..والرضا اللي فيها

الحركة دي كانت بتديني "نفحة نورانية" ماتتوصفش

.
.

حاسة إني عمّالة أعافر في الدنيا

عشان أحافظ على حبّة الحاجات الحلوة اللي باقية جوايا

بحاول أحوّش منهم اللي أقدر عليه

عشان عارفة كويس اللي مستنيني ايه..!

بحاول..

لكن حاسة إنهم بيتسرسبوا_غصب عني_ من بين إيديا

النور بيقلّ..والبراح بيضيق..والراحة مابقتش بتريّح..

مش باقي غير الرضا..هو اللي لا اتغير ولا قَلّ جوايا..

وهو اللي بجد بدعي ربنا يخلّيه..

عشان من غيره الدنيا بتبقى فعلا جحيم

.
.

عمّالة اسأل نفسي كل شوية

ايه كان هايجرى لو الزمن وقف بيا هناك؟

وعشت بقية حياتي هناك..لوحدي..جوه الحـرم؟

و قطعت علاقتي بالدنيا و بكل البشر؟

الدنيا ماكانتش هاتتهد ولا حاجة..!

.
.

من ساعة ما رجعت وأنا مزبهلة..

مستغربة كل حاجة..

مستغربة الناس ومعاملتهم وتصرفاتهم..

و لسان حالي بيقول "من أنتم؟"

ولا كأني مثلا كنت عايشة في وسطهم

قبل ما أسافر/أتغسل/أتغيّر

اكتشفت إن التعامل مع البشر ده..

شيء قميئ..قميئ فعلا..

و الدنيا دي وحشة أوي

أنا مش عايزة منها حاجة..خالص

مش عايزة غير إنها تسيبني..

تسيبني في حالي..و "لـ حالي"..!ـ

.
.
.
.

*
الصورة من تصويري

لقطتها من شباك جوه الحرم المكّي

بيطل على الساحة..باب الملك فهد/74

عندي أمل كبير

إني لما أدخل الجنة _إن شاء الله يعني_ـ

هاعرف تفسير كل الحاجات اللي بتحصل لي

ومش فاهمة الحكمة منها

و الإشارات اللي بتتبعت لي

و مش قادرة أفهم مغزاها

مش الجنة بردو "فِيهَا مَا تَشْتَهِيهِ الأَنفُسُ"؟

.
.
.

دا الحل الوحيد اللي بحاول أقنع بيه نفسي دلوقتي

كل ما تحصل لي حاجة مش فاهماها

ألاقيني بقول لي: اصبري

مسيرك تعرفي..مسيرك تفهمي

حتى لو مش هنا

وحتى لو مش دلوقتي

ربك موجود

"وَمَا كَانَ رَبُّكَ نَسِيًّا"

ـ