وجــع البنــات 2

انتي عارفة اللي بتسندك دي

وبتقولك معلش اتحمّلي..؟

محتاجة بردو اللي يسندها ويطبطب عليها..

محتاجة بردو اللي ياخد بإيدها ويقوّيها..

بس هي مش بتعمل ده لأنها أقوى منك

ولا مسنودة عنك..ولا صالبة طولها

بالعكس..!

الفرق بينك وبينها إنها عارفة كويس وفاهمة

إننا لو ما سندناش بعض..

واتعكّزنا على بعض..

وكان ضهرنا في ضهر بعض..

هانعجّز!

هانقع!

مش هانقدر نكمّل!

.
.
.
نفسي بجد نتعامل مع بعض على الأساس ده!
ـ
.................................................

وجــع البنــات 1

عـــزم

أنا هاخِفّ منك

مسيري أخِفّ منك

لازم أخِفّ منك

أكيد هاخِفّ منك

إن شاء الله هاخِفّ منك

يارب أخِفّ منك
.
.
.
هافضل أرددها جوايا

لحد ما أصدقها وأتمناها بجد وأقدر أحققها

لإني مؤمنة تماما بمقولة مريد البرغوثي:

"أحياناً..عندما نريد جِدّاً..

عندما نريد بقُوَّة..يكون ما نُريد"
.
.
.
ومافتكرش إني دلوقتي

عايزة/محتاجة/بتمنى

حاجة أكتر من كده..!

ـ

...يمكن

إلبس أحمر

و وردي و بمبة

و كل الألوان الفاقعة

و اتحرّك..

و صرّخ!

يمكن يترد الدم

لأطرافك

الزرقا

الساقعة....!

.
.
.

وليــد طاهر

ـ"البدايـات"

ما أجملها!

.
.

"النهايـات"

ما أقساها!

.
.

"الانتكاسـات"

ما أصعبها!

ـ

إنها أقـدار

ـ"قالت عبّادَةُ الشمس للشمس:

مُمِلٌّ إتِّباعُكِ كلَّ يوم!"

.
.
.

مريد البرغوثي

............................................

و رغم ذلك..لم تكفّ يوما عن اتّباعها

مثلي تماما..ملَلْتُك!

ولم أكفَّ يوما عن اتّباعك

كما لم أقوَ يوما على نسيانـك

زي النهارده

زي النهارده

سبت الواقع/الكرة الأرضية بكل ما فيها

و طرت على هنا

شردت هنا

و حطيت بجناحيني هنا

زي النهارده

من 3 سنين بالظبط

وفي نفس الساعة والدقيقة دي

بنيت العش ده لوحدي

قشة قشة

أو بوست بوست بمعنى أصح

أنا حقيقي ممتنة لوجود المدونة دي في حياتي

مش عايزة أقول إنها بيتي التاني

لإنها في الحقيقة بيتي الأولاني

:)

مجرد حلم

حلمت إني شعب..!

حلمت إني شعب ومصلوب بطولي

على أرض سمرا

ودمي بينـزف ومليان جروح

وفوق صدري جمرة

يميني مربّط على أرض طابا

شمالي ممسمر فـ "أولاد علي"

ورجلي على جذع نخلة فـ "حلايب"

ومرتاح براسي على حِجْر مصر
.
.
.

مارضيتش أكمّل حكايته

عشان قلب بكابوس

بقية الحلم هنا :

كأنـك مفيش

حنية الدنيــا فيــك

ومعــاك بحسّ بأمــان

ولا يسـوى عُمري إلا بيــك

حقيقة

كــل يوم بيعــدّي

تزيـد غـلاوتـك عندي

.
.
.

فاكرة أما كنتي بتقوليلي

انتي ليه مش بتتكلمي؟

ليه مش بتطلعي اللي جوه؟

فاكرة ردي كان ايه؟

"أنا مش بعرف أفضفض حتى لنفسي"

عارفة بأه

الكلام اللي سمعتيه ده أنا ماعرفتش أقوله لنفسي

ولا طبعا لأي حد

أنا مستغربة بجد إنك قدرتي تزقّي الباب..

و تفتحيه..!!!

شكرا بجد..شكرا على كل حاجة

بسسسست

أيــوه انتي

:)

عجيبة

عجيبة هي الحياة بمنطقها المعاكس؛

أنت تركض خلف الأشياء لاهثاً،

فتهرب الأشياء منك

وما تكاد تجلس وتقنع نفسك بأنها لا تستحق كل هذا الركض،

حتى تأتيك هي لاهثة..!

وعندها..لا تدري؛

أيجب أن تدير لها ظهرك؟

أم تفتح لها ذراعيك،

وتتلقى هذه الهبة التي رمتها السماء إليك؟

والتي قد تكون فيها سعادتك،

أو........ هلاكك..!

.
.
.

أحــلام مُستغانمي

وفينــك؟

خايفة يخلص عُمــري كله سنين عِجــاف

SOS

ـ"......وَالْمُسْتَضْعَفِينَ مِنَ الرِّجَالِ وَالنِّسَاء وَالْوِلْدَانِ

الَّذِينَ يَقُولُونَ رَبَّنَا أَخْرِجْنَا مِنْ هَذِهِ الْقَرْيَةِ الظَّالِمِ أَهْلُهَا

وَاجْعَل لَّنَا مِن لَّدُنكَ وَلِيًّا وَاجْعَل لَّنَا مِن لَّدُنكَ نَصِيرًا"

سورة النسـاء - الآية 75
.
.
.

ربنــا أخرِجنـا من هـذه البلـدة الظالم حُكّامها

ألـف خسـارة

بعد ما باع أرضـه وفات ناسُه

عَــوّاد باع صوتـه وإحساسُه

تعبان معذور بردو يا عالم

منهم لله عدّوا أنفاسُه

و المرة الجاية يبيع بلده

مهو أصل الضنْـك خلاص داسُه

.
.
.

تخاريف

من وحي الانتحـابـات

أيوه بالـ "ح"!

ـ

!لَكَـم أحتــاج

تمر بك أيام تشعر فيها بأن كل شيء يثقل على صدرك..

الذين يحبونك والذين يكرهونك..

والذين يعرفونك والذين لا يعرفونك..

تشعر بالحاجة إلى أن تكون وحيدًا كغيمة..

أن تعيد النظر بأشياء كثيرة..

أن تعود إلى ذاتك مشتاقًا..

لتنبشها وتواجهها بعد طول هجر..

أن تفجر كل القنابل الموقوتة التي تسكنك

.
.
.

غــادة السمـّــان

كده و كده 2010

حد ناوي يشارك في الـ"كده وكده" بتاعت بكرة؟

عن نفسي هاعمل اللي عليا وأروح

عشان يوم ما ربنا يسألني

عملتي ايه في البوظان اللي حواليكي

ألاقي كلام أقوله:

"أنا عملت اللي عليا يارب وحاولت..

ومش مسؤولة عن النتيجة"

.
.
.

و لو يا سيدي مش لاقي حد عِدِل يستحق صوتك

روح إبطل صوتك..

امنع استغلاله..امنع سرقته

أهو على الأقل تبقى عملت حاجة مفيدة

كفاية سلبية

وجــع البنــات 1

حوار مسدجات

بين اتنين صحاب..صحاب أوي :

- "شكلك كده مش بتدعيلي..

الدنيا ضلمة أوي..عتمة"

- "والله ضلمة جدا وعتمة جدا..

و إحساس بالحرمان والاحتياج بيمص الدم..

يارب يارب مالناش غيره"

ـ

هــأو

الحـِــزن الوطنــي الديمقـ ـ واطي

علشـان تطمن على خراب مستقبلك

و مستقبل أولادك

دا إذا حصل و اتجوزت يا....

حلو

فترضـى

"ـ"و لسـوف يعطيــك ربـُّـك..فترضــى

.
.
.

فيه حاجات أول ما بتضيع من إيدينا

بنزعل أوي عليها..

وبنتخيل إن الدنيا خلاص كده هاتقف بعدها..

و هانقضي بقية عمرنا نبكي عليها ونتحسر ،

و بعدين واحدة واحدة بتبدأ تبعد من الذاكرة..

و تحل محلها _في حياتنا_ حاجات تانية/أحلى ،

و بعدين فجأة نفتكر الحاجات القديمة اللي ضاعت مننا ،

و.......

و نبتسم ،

آه نبتسم..ونقول الحمد لله إنها راحت ومارجعتش..

عندي أمل إني في يوم من الأيام

أبتسم على كل اللي راح مني..!

ـ

:)

عيد سعيد

وكل سنة والطيبين أطيب

واللي مش طيبين..يحاولوا يكونوا طيبين

مش هايخسروا حاجة والله لو حاولوا

:)

نقطة نور

ـ"انت اللي فاضل من الأيام..انت

انت اللي باقي من الأحلام..انت"
.
.
.

عارف يا بابا..

من يومين كنت بقول لنفسي

"الدنيا دي خلاص بقت كلها سودا

و مابقاش فيها أي حاجة عدلة"

وبعدين اكتشفت إني غلطانة

ازاي أقول كده وانت موجود في حياتي؟

كل مرة تضيق و تضلم في وشي

انت اللي بتطبطب عليا..بتهوّنها عليا..

انت اللي بتحس بيا..

حتى لو ماقولتليش إنك حاسس بيا..

أو عارف إني مش متظبطة..

مجرد إحساسي إنك حاسس بيا..

يقيني إنك بتدعيلي كل يوم في الفجر..

بيطمّني

عارف؟

انت دلوقتي نقطة النور "اليتيمة" في حياتي..

عارف كمان؟

أنا نفسي أقدر أترجم لك كل المشاعر الحلوة اللي بحسها ناحيتك

نفسي أترمي في حضنك وأفضل أعيط كتيييير..

بس للأسف مش هاعرف أعمل كده..

عشان انت بتزعل أوي أما بتشوفني بعيط..

وأنا مش عايزة أزعلك أبدا

عشان انت طول عمرك بتحب تفرحني

و بتخاف تزعلني

ومابتحبش أي حد/حاجة تزعلني..

طب تصدق بأه؟

أنا بفكر أكتبلك جواب أقولك فيه كل الكلام ده

بس خايفة تقول عليا مجنونة! :)

.
.
.

بابا..أنا نفسي أبوس إيدك أوي

يارب

أنا تعبانة..و مش عارفة أرضى..

و مش عارفة إذا كنت راضي وللا لأ!

يارب لو راضي..راضيني ،

أنا مش عارفة أضحك على نفسي

وأقول زي ماكنت بقول دايما

"راضية يارب"

مش عارفة أقولها زي ماكنت بقولها ،

مش عارفة أحسّها زي ماكنت بحسّها ،

يارب لو راضي..ارضيني..

مش لازم تحقق لي اللي بتمناه ،

بس ارزقني الرضـا بكل حاجة ،

و يارب لو مش راضي..

ارضى..و رضّيني..

يارب

يارب

يارب

إنــذار

اللي اتقال المرة دي كان مجرد "تنفيس"

غير مقصود/لا إرادي ،

و لحد دلوقتي أنا ماسكة نفسي بالعافية ،

اللي الجاي بــأه

هايبقى مجرد "انفجــــار"

غير مقصود/لا إرادي ،،

بس الكلام اللي هايتقال ساعتها

عُمره ما هايتنسي

.
.
.

وأخــــيرًا :

"الضغــط يولّـد الانفجـــار"

و البادي أظلم!

ـ

يارب

أنا عايزة آجي عندك..

بس تكون راضي عني..

أعمــل ايــــه؟

اعــتراف

بقالي فترة كبيرة أوي مقصّرة في حق ناس كتير..

من نواحي كتير ؛

اتصالات ، زيارات ، مقابلات ، مجاملات ،

لكن أكتر حاجة مقصّرة فيها ومأثّرة فيا بجد..

هي "الدعــاء"

زمـان كان قلبي مليان خير..

بدعي للناس كلها..صحابي كلهم....قرايبي كلهم

من غير ما حد يوصيني..أو يطلب مني ده

كنت بعمل ده بحب..و كنت مبسوطة و أنا بعمله..

أما دلوقتي! و من فترة مش قليلة..

أما حد بيطلب مني أدعيله..

بقوله حاضر..وبدعي له فعلا

بس مش بإحساس الدعاء اللي كنت بحسّه زمان..

بقيت أدعي عشان أنا وعدت_أو حتى قولت بس_ إني هادعي..

يعني مجرد تأدية واجب، و التزام بكلمة مش أكتر..

مش عشان أنا بجد حابة إني أدعي..

زي ما كنت بعمل زمان

الإحساس ده بأه مضايقني جدا..

خانقني..مكتّفني..!

و في المقابل بقيت حاسة إن محدش بيدعي لي :(

و بسبب الإحساس اللي مسيطر عليا ده..

بقيت مش عايزة أطلب من أي حد يدعي لي..

مش عايزاه يتكتّف زيي..!

ـ

ـ"مش كل عين شايفة

يبقى فيها ضـيّ..

ولا كل قلب عايش

يبقى لسه حـيّ..!"
.
.
.

علي ســلامـة

مش كفاية عليا البرد من كل النواحي؟

كمــان أرَق؟!!

لأ كده كتـــير بجد!

.
.
.

على أد مانا بستناه من السنة للسنة

أول مرة أخاف من الشـتـا

ـ"مَن جرّبَ الكيَّ لا ينسى مواجعه..

ومَن يرى السُمَّ لا يشقى كمن شَـرِبَ"

.
.
.

مهما قولت إنك حاسس باللي أدامك

و مهما حسيت بيه فعلا..

و حاولت تأكّد له ده..أو حتي تأكّده لنفسك

درجة إحساسك بيه مش هاتوصل لـ 10/1 من إحساسه..

تحس إزاي بحاجة ماجربتهاش؟

تقدّر ازاي إحساس ماعدّاش عليك؟

حياة كاملة ماعيشتهاش قبل كده؟

عارف طعم العلْقم؟

طيب دوقته قبل كده؟!

مهما حاولت مرّات ومرّات..

مش هاتعرف تحكم على حاجة مادوقتهاش!

عشان كده..ليكم كلكم ياللي بترددوا نفس الاسطوانة دي:

(حاسين بيكي - مقدّرين إحساسك - متخيلين حياتك - إلخ...)

بقولكم كـلــكم :

"انتم مش عارفين حاجة ولا حاسين بأي حاجة..

من امتى كان اللي إيده في الميه..زي اللي إيده في النار؟

و ياريت توفّروا لنفسكم الكلمتين دول..ومعاهم النظرتين إياهم!

و اعرفوا كمان حاجة مهمة/أخيرة:

الحاجات دي بتوجع..أكتر ما بتريح!"

ـ

تيجي؟

تيجي نهرب..
م الحقيقة..
م الصور..
من خبر عاجل يخض..
تيجي..
لا نفهم..
ولا نعرف..
ولا نقدر نرد..!
تيجي..
نتعلم سخافة..
بشويش كده..
بصنعة لطافة..
وتبقى بياع الكنافة..
وأبقى بياع الكلام..؟
تيجي نهرب..
م الألم..!
م الحزن..!
م الأحلام..!
تيجي نتعلم ننام..
تيجي نتباع بكام..
تيجي..
نعمل عملية تجميل..
و نشيل.........
ولا حرام..
تيجي..
نبقى طوب..خشب..إزاز..!
بلاطة جنب بلاطة..
تيجي..
ننسى بعض ببساطة؟؟؟؟
وتبقى بياع البطاطا..
وأبقى بياع الهوا..
تيجي.........
سوا ...... سوا
نهرب..
م الأمل..
نطلع بطاقة..
بدون عمل..
نأجر عجل..
نركب جمل..
تيجي..
نبقى ف اللذاذة؟
وأجيب مصاصة..
تجيب بزازة..
تيجي نبقي..
ملناش عازة؟!
زي كل شئ جميل..
تيجي......؟
مستحيل..!
هي كده..
وملهاش بديل..
تيجي رجلك..
تيجي..
تهرب بجلدك..تنجرح..
يوجعك قلبك بجد..!
لا تقبل أي حاجة..
ولا تبقى أي حد..
تيجي..............؟
.
.
.

علي سلامة

اكتشاف

كنت فاكراني برفــرف

أتارينـي بفـرفـــر

وأنا مش حاسة..!

ـ

بيني و..بيني

حوار..مجرد حوار

-أنا : مالك؟ فيه ايه؟

-أنا بردو : مفيش..مالي؟

- ايه اللي مضايقك؟

- مش متضايقة..أنا كويسة!

- انتي زعلانة ليه؟

- مش زعلانة..خالص

- كداااااابة و ستين كدابة!

- آه أنا كدابة..و بكدب عليكي..سيبيني في حالي

- طيب بتكدبي ليه؟ مخبية ايه؟

- الإجابة هاتفرق في ايه؟ طالما عارفة إني هاكدب

- مش هاسيبك غير أما تقولي

- أقول ايه؟ مفيش حاجة أقولها

- طب أقولك أنا! انتي زعلانة عشان......؟

- (صمت)

- وللا عشان .........؟

- (صمت)

- وللا عشان .......؟

- كفاية

- وللا عشان ........؟

- حرام عليكي..بجد كفاية

- حرام عليكي انتي اللي بتعمليه..
هاتفضلي كاتمة كاتمة كاتمة لحد امتى؟
هاتموتي..والله هاتموتي..

- عارفة..وده المطلوب..خلاص ارتحتي؟

- أنا زعلانة عشانك..و عليكي :(

- وأنا مش عايزة حد يزعل عشاني..ولا عليا..
ومش محتاجة طبطبة من حد..ولا حتى منك!

- :(

ـ

بلاد العجائب

كـــل حاجة في بلدنا بتغلا

إلا حاجة واحدة..

كل يوم بترخص زيادة عن اليوم اللي قبله

البني آدم!

ـ

يــوم فــوق..فوق السحاب في السما

و 100 تـحـــــت..تحت التراب في الأرض!

ـ

و من السمــوم..ترياق

ـ"آخر الذنــوب توبة..ومن السمــوم..ترياق"

.
.
.

ماعرفش ازاي ولا ليه ولا تحديداً امتى..

بس ده بالظبط اللي حصل!

يوم ما بطّلت ألحّّ في الدعوة دي

هو نفس اليوم اللي حسيت إني بدأت أخفّ فيه..

هو نفس اليوم اللي بدأ السم يتسحب من روحي فيه..

هو نفس اليوم اللي بدأت أفهم الحكمة من معظم اللي مريت بيه..!

شكراً يارب.. شكراً على كل حاجة

:)

سبحانه

هو بــس اللي باقـي

ملكـوتـه لا نهـائي

ارجــع

يا سندباد العصر..ارجع

لم يعد في الحب شيءٌ غير هذا الانتحار

ارجع..فإن الأرض شاخت

والسنون الخضر يأكلها البوار

ارجع..فإن شواطئ الأحلام

أضناها صراخُ الموج من عفن البحار

هل آن للقلب الذي عشق الرحيل

بأن ينام دقيقة..مثل الصغار؟!

هل آن للوجه الذي صلبوه فوق قناعه عمرا

بأن يُلقي القناع المستعار؟!

.....................................

فاروق جـويـدة

من ديوان "آخر ليالي الحلم"

قصيدة "النجم يبحث عن مدار"
ـ

رجـــــاء

كل ما أقول هانت خلاص..
ألاقي لسه المشوار طويل..
وكل ما أقول عطشان يا نيل..
أعطش زيادة!
.
.
.
علي سلامة

.......................................................

كل ما أدعي و أقول:

"اللهم لا تعلّق قلبي بما ليس لي"

ألاقي نفسي بتعلّق زيادة..بتشعلق زيادة..

بتعذّب زيادة..

يارب فهّمني..نوّر لي بصيرتي..

عشان أنا تعبت من الإشارات..

الإشارات اللي بتتوّه..أكتر ما بتهدي و تطمّن..

يارب خليني أرتاح..

خليني أفرح..

خليني أعرف أعيش..

يارب

هلاوس

ـ"خايفة تكون الفرامل سابت وأنا مش حاسة..

و أبص فجأة ألاقي نفسي لبست في الحيطة"

الكلام ده كنت قولته لنفسي من فترة

قبل ما أتأكد إنها _الفرامل_ سابت فعلا

و إني أساسا منّي للحيطة مباشرةً

و إذ فجأةً يقع تحت إيدي ديوان لفاروق جويدة

بيقول نفس الكلام..و هو بردو عن "الحيطة" نفسها

بس الأسلوب طبعا..أرقى بكتير..مفيش مقارنة أساساً

بس سبحان الله

أتاري "الحيطة" دي معروفة جدا

و كل الناس بتلبس فيها

بس أنا عشان كنت فاكرة إن الفرامل بتاعتي جامدة

افتكرت إني حامية نفسي منها

وطول ما أنا ماشية بثبات..وببص عليها من بعيد

أنا كده في الأمان

لحد ما اكتشفت إني ماكنتش فاهمة حاجة

وكل حاجة ليها وقتها اللي لازم تحصل فيه

مهما تخيلنا نفسنا واخدين كل الاحتياطات

ومأمّنين نفسنا ضدها

طالما مكتوبة علينا..لازم في يوم هاتحصل
.
.
.
"قلبي الذي علمته يوماً جنون العشق..

علمني هموم الانكسار..

وجــهٌ جمــــيل..

طاف في عيني قليلاً..واستدار..

ومضيتُ أجري خلفه..

فوجدت وجهي في الـ....جـــدار"..!!!!

............................

فاروق جـويـدة

من ديوان "آخر ليالي الحلم"

قصيدة "النجم يبحث عن مدار"

ـ

سـؤال مخنوق

هو أما يكون فيه حد في حياتك

كل همّه في الدنيا دي

إنه ينكد عليك و يحرق لك دمك

و يشوفك حزين وتعيس

أيوه بجد..بيحب كده..و بيسعد بيه كمان!!

المفروض تعمل معاه ايه؟

وتتعامل معاه ازااااااااي؟!!!

* مع الأخذ في الاعتبار إن وجوده في حياتك "جبري"..

مفيهوش اختيار
.
.
.
امبارح حلمت إني جت لي صدمة عصبية..حــــادة

والله العظيم..أنا مش مجرد حاسة..

بل شبه متأكدة إني على وشك تحقيق الكابوس ده

و ذنبي في رقبتـك

!

و إلى ربـك فارغب

ـ"منيبين إليه و اتقـوه"
.
.
.
رمضان كريم

وكل سنة وانتم طيبين

:)

وحـدي و ماشي بصبري في الملكوت

حدوتة

هي عارفة إنها شاغلاه..

متأكدة إنه بيستناها..

شايفاه بيدوّر عليه..

هو كمان..

عارف إنه شاغلها..

مالي فراغها..

حاسس إنها بتستناه..
.
.
.
هي عارفة إن ماينفعش..

هو عارف إن مفيش فايدة..

وبكده خلصت حكايتهم..

من قبل حتى ما تبتدي!
ـ

بلد تيت

ـ"يعني ايه تبقي انتي "هبة النيل" يا بوبة!

و كل يـــوم الميه تقطع؟!!!

يعني ايه لما أشتكي غلو الفاتورة

يقولوا تشكي..بس تدفع!!!"
.
.
.
هشام الجَخّ

.......................................................

يعني اييييييه يبقى عندنا السد العالي

و كل يوم الكهربا تقطع؟!!!!!

يعني ايه أعدّي على مدرسة الثانوي اللي كنت فيها

أشوف الفصول كلها منورة "بالليل"

و أروّح البيت ألاقي الكهربا قاطعة؟

يعني ايه أدخل مبنى "سجل تجاري مميز!"

ألاقيهم مشغلين 4 أو 5 أجهزة تكييف في وقت واحد

في مساحة لا تتعدى 25 متر؟!!!!!

ايييييييييييه العته اللي بقينا فيه ده؟

.
.
.

أنا بأه عايزة أعرف حاجة

آدي حال الميه والكهربا

طب بالنسبة للهوا..أيوه الهوا اللي بنتنفسه ده

هايقطع امتى عشان أعمل حسابي

و أعبّيه في....زكايب!!
.
.
................................................

تحديث:

اعتذار واجب

:)
ـ

لقد نفذ رصيدكم

ـ"عفوا..لقد استنفذتم عدد مرات

الحصول على مشاعر طيبة..

يُرجى إعادة شحن القلب مرة أخرى"

هذه رسالة مسجَّلة..!
ـ