عواصفي..فوق حدود وصفي

النهــارده _بحــق_ كان يوم من عمري

اللي شوفته بعيني النهارده مايتوصفش

ولا يتحكيش

النهارده بس عرفت إن فيه فرق كبيييييير أوي

بين إنك تشوف حاجة في فيديو وانت قاعد في بيتك

و إنك تعيش الحاجة دي ع الواقع/في الشارع

النهارده بس حسيت أد ايييييييييه الناس دي مؤمنة باللي بتعمله

أد ايييييييه متحملة وثابتة وصامدة

النهارده كنت شاهد عيان ع اللي بيحصل

النهارده مشيت وسط القنابل والرصاص والإزاز

لأ مش مشيت..أنا جريت..

أيوه..أنا جريت في الشارع..!

ماكنتش بجري من حرامي..ولا مجرم..ولا مغتصب..

أنا كنت بجري من "الأمن"..!!!!!!

"الأمن" اللي هو المفروض مصدر "الأمن"

أصبح مصدر الرعب والذعر و الفزع..!!!

أنا ماكنتش ماشية في مظاهرة..

ولا بسرق خير دولة..ولا بنهب ثروة شعب!!!

أنا كنت نازلة من شغلي مروّحة..

كنت بدمّع في المواصلات من اللي شوفته..

بحاول أقفل عيني على الدموع عشان ماتنزلش..

لكن صممت ونزلت!

وفجأة سمعت الآية دي

الآية اللي نهى بيها الإمام الركعة التانية _تقريبا_ لصلاة العشا

كانت إشارة..أنا متأكدة من إنها إشارة..

"وَلاَ تَحْسَبَنَّ اللَّهَ غَافِلاً عَمَّا يَعْمَلُ الظَّالِمُونَ إِنَّمَا يُؤَخِّرُهُمْ لِيَوْمٍ تَشْخَصُ فِيهِ الأَبْصَارُ"

آية واحدة..لخصت اللي بيحصل..واللي لسه هايحصل

أنا عارفة إن كلامي مش مرتب..ومفيش جملة مفيدة..ولا فكرة كاملة

بس أنا مش عارفة أتلم على نفسي من ساعة ما رجعت

و مش عارفة حتى أحكي اللي عشته بالتفصيل

بس أنا حبيت أسجّل أحداث اليوم ده

عشان أنا واثقة إننا في يوم من الأيام

هانقول اللي اتمنيناه وتعبنا عشانه حصل

وقريب أوي إن شاء الله اليوم ده

................................................

العنوان من قصيدة "ايزيس" لـ هشام الجَخ

................................................

الصورة لميدان التحرير ليلاً أثناء مظاهرة 25 يناير

يا الله

رب السماوات العُلى

رِفقــًا بأهـل الأراضيـن

أشكيه لك لك لك

يا صاحب المُلْك

تحية

انتم السابقون

و كل المظلومين بكم لاحقون

إن شاء الله

:)

أسئلة مشروعة

لحد امتى هافضل أستنى حاجات ماتجيش؟

لحد امتى هافضل أتمنى حاجات ماتحصلش؟

لحد امتى هافضل مستنية بكرة..

اللي حالف ماييجي أخضر ويشوفني متبسّمة؟

لحد امتى هافضل أتفرج من بعيد

على حاجات نفسي فيها وإيدي مش طايلاها؟

لحد امتى هاتفضل التعاسة تنخر في عضمي

وأنا واقفة بتفرج عليها؟

لحد امتى هافضل متحمّلة وراضية

بالحياة الجرداء اللي عايشاها؟

لحد امتى هافضل مخبية مشاعري الحلوة/الوحشة

عن الناس اللي حواليا؟

لحد امتى هافضل كاتمة أسراري جوايا..

في حين إن "جوايا" نفسه تعب منها فعلا؟

لحد امتى هافضل كده؟

لا أنا عايشة مع العايشين..ولا ميتة زي الميتين!

لحد امتى هافضل أتفرج ع الدنيا من بره؟

أنا فعلا حاسة إني عايشة بره الدنيا!

.
.
.

أنا على وشك الانهيــار..!

ـ

ماتشدّنيش من شَعري يا عصفور

ما تفتكرش إني بتعب لما بتسافر..

أنا بس بنساك..وأعافر..

وأعافر في الدنيا من غير أخ (!!!)

ما تفتكرش إني شاعر..

انت مش فاهم!!!

أصل الغُنا زهرة..

في كل المواسم..

يا خسارة..

ما بتطلعش..!!

ما تفتكرش إني نعش..

أو كُبّايات فاضية..

أنا كُبَّايات عصير قصَب ملْيانة ع الآخِر..

والخـلْق ما بتشربش..!

ما تفتكرش إني تاجر نُور..

و رُلْمان بلي..

مُصفّحات من عيون الناس بتتفجَّر..

و انت العيون والبضاعة..

وزِيطة المتْجر..

والأرض بنشارة خشب مفروشة..

تتدارى دمي الشّجي ما يبانش..

و إن كنت فاكر يا ننِّي عيني إني بتعب لمَّا بتسافر..

كل الحمام هاجر..

كل النسايم خناجر..

كل العيون طالعة في الصورة ولا بتلمعْش..

فكَّرتنى بالذي من مَطْرحه إتّاخر..عشان يقعَّدني..!

أكتب شعْر وأذاكر..

فكَّرتني بالمباخِر..

بالجمْر تحت بحُور من عشق شمس بنُـوت بتتبخّر..

أنا مش بحبك..بس بتبخَّر..

و أقدر أَعيش أقدر..

لمَّا تاخُدني المراكب..و إنت مش راكب..!

و أخبّي تحت المراتب قلبي حُقّ بخور..

ماتشدّنيش من شَعري يا عصفور..

أنا مش هاطير..!

و الحبيب من كل نُور غايب..

الأرض زُهرِية فاضية واللبن رايب..

واللّيل معبّي في زكايب في انتظار النُور..!

.
.
.

من روائع

بهـاء چاهـين

حاجات كتير فى حياتي اللي فاتت..ماتت

لكن عندي أمـل فيها..

عشان كده..الزرعة اللي ف بلكونتي

رغم إنها من زمان ماتت..

لكن يوماتي باسقيها..!

.
.
.

خالد كساب

..........................................

على الهامش:

أنا فعلا لسه باسقي الزرعة الميتة في بلكونتي

آه

آه يا بــراح عمّـال بيضيق

صبح و زيه الصبح التاني

ليل ملضوم في الليل التاني

و أنا مش رايح..أنا مش جاي

أنا مش واقف حتى مكاني

.
.
.
منـــــير

تبرئـة

ـ"مَن قَتَلَ نَفْسًا بِغَيْرِ نَفْسٍ أَوْ فَسَادٍ فِي الأَرْضِ فَكَأَنَّمَا قَتَلَ النَّاسَ جَمِيعًا

وَمَنْ أَحْيَاهَا فَكَأَنَّمَا أَحْيَا النَّاسَ جَمِيعًا"

سورة المائدة..الآية 32

.
.
.

الإرهـــاب

أنـا مسلم

أنـا ضــده

Message in a Bottle!

ماعنديش كلام كتير أقوله

لا عن اللي فات ولا عن اللي جاي

و مش ناوية أتكلم كتير

2010 :

حسيت فيكي بحاجات جميلة..جميلة بجد

لكن قلبي لسه مارتواش!

و طبعا نكّدتي عليّ كتير كعادة كل السنين

بس أنا بردو راضية!

أيوه اديتيني حاجات عايزاها

لكنك بخلتي عليا بحاجات تانية بتمناها

اتوسمت فيكي خير..و اترجّيتك

و مع ذلك بردو عملتي اللي انتي عايزاه

تمام زي اللي قبلك

ما انتم اخوات..!

و أكيد مش هاتختلفوا عن بعض كتير

و بجد كفاية عليكي كده!

ـــــــــــــــــــــــــــــــــــــــــــــــــــــــ

2011 :

مش هاطلب منك كتير

خليكي حنيّنة..رحيمة..كريمة

عليّ و على كل الناس

عشان بجد محدش بقى حِمل أي وجع

و على أد ما تقدري

طبطبي على الناس

و لو يا ستي مش ناوية تفرّحيهم

بلاش تزعّليهم..!

.
.
.

و أظن أنا مش طماعة أهو

و لا طالبة كتير يعني

:)